Im Summer het dr Lehrer Christian Oberli im Schueuhus Äbnit geng weniger Schüeler gha. Im Summer 1845 het är i sine Ufzeichnige gschribe, dass 138 Ching id Schueu hätte söue, im Durchschnitt aber nume 50 syge cho. Einisch heig är nume 22 Ching zeut. Vo dene Eutere, wo dr Lehrer het müesse vermahne, sy nid nume Tounerlüt u Handwärcher derby gsy. O ei Puur isch dr Aasicht gsy, dass Schrybe u Läse nutzlosi Künscht syge.
D Magdalena Kühni vom Unterhofu (Unterhochfeld) isch aus Nöitöifere trotz dr Ermahnig ganz gäge d Schueu gsy. Im Apriu 1846 hei de no es paar angeri Eutere müsse vor Gricht erschyne: Dr Hächler Ludi Lüthi im Bomattschache u dr «Händschli Peter» vo dr Längmatt (Peter Lüthi). O dr Richter het bir Magdalena Kühni nüt chönne abbringe.
Ganz angeri Problem hei Eutere gha, wo im Armehuus hei gwohnt. Die heige ihrer Ching nid chönne i d Schueu schicke, wüu si gar kener Chleider heige gha. Im Summer 1846 het me niemer aazeigt, wüu me überau Mangu u Not het gha. D Pryse sy geng meh gstige, e Buess hät niemer chönne zahle.
I dene Jahr isch d Not ir ganze Schwyz enorm gsy. Öppe d Heufti vo de Lüt isch arbeitslos gsy. I dere Zyt sy viu usgwanderet. Uf dr Lischte, wo dr Lehrer Oberli d Väter het notiert, wo ihrer Ching nid hei id Schueu gschickt, isch o der Zimmermaa Hans Kohler vom Schache gstange. Dä het sis Glück de o z Amerika probiert. Für siner Nachkomme z Amerika hani o scho einisch Aagabe zämegsuecht für ihri Ahne-Tabäue.
D Nöitöifere Magdalena Kühni het de no einisch vor Gricht
müesse aatrabe: Im Mai 1847 het de ds Amtsgricht vo Signou dr Magdalena Kühni die euterlichi Gwaut über ihre Suhn entzoge u dr Gmeinrat vo Louperschwiu informiert, si söue dere Mueter ire Suhn ga wägnäh. Das het aber im Gmeindrat niemer wöue mache. Me het wäge däm die angere Eutere, wo ihrer Ching nid zur Schueu gschickt hei, o nid gmäudet. Ersch im Winter 1849 het me sech wieder trout, die Vätere am Statthauter z mäude. Ganzi 19 Eutere hei ihrer Ching nid i d Schueu gschickt gha!
Am 11. Oktober 1850 isch dr Oberli aus Lehrer i Pension gange u dr Chaspar Lüthi isch Lehrer worde. Är isch e Louperschwiler gsy; si Vater het d Mühli im Tannschache gha.
Während dr Winterschueu isch dr Pfarrer Brüderli nie uf Bsuech cho, wüu är wägeme Beibruch nid het chönne wärche. 24 Väter het dr Lehrer gmäudet, wüu si d Ching nid hei wöue i d Schueu schicke: Die Väter sy fasch aus Handwächer gsy: Wäber, Schnyder, Bäsemacher, Murer, Naguschmied, Lumpesammler, Metzger, Siebmacher, Sagifieler, Strumpfwäber u Hufschmied. Nume grad drei Pure sy o gstraft worde.