D Poscht isch geng ume züglet worde

Z Signou gits scho im Jahr 1788 e regumässigi Poschtverbindig mit Bärn, wo vor Fischer-Poscht isch betribe worde. Signou drum, wüu das denn dr Houptort vom Oberämmitau isch gsy, Langnou isch das erscht sitem Jahr 1798. D Fischer-Poscht isch mit dr Poschtgutsche vo Bärn uf Luzärn gfahre. Wo de Bärn d Poscht wider säuber het überno, isch de o d Reed gsy, z Signou e Poschtablag z mache. 1833 het me de dr damalig Bäre-Wirt, dr Ueli Röthlisberger, aus erschte Poschtablagehauter ygsetzt. Dr Wirt isch aber de nid öppe die Briefe, wo vo Bärn sy cho, ga vertrage. Är het la usrichte, es heig de no e Brief zum abhole. Dr Empfänger het de müesse i ds Dorf ache u dä Brief im Bäre ga abhole. Me cha sech öppe däiche, warum houptsächlich Wirte zu de erschte Poscht­ablagehauter hei ghört. Kene isch e Brief ga reiche, ohni öppe no es Schöppeli Wy z näh!  

1856 isch de Signou sogar zum Poschtamt cho, aber o hie isch dr erscht Poschthauter e Wirt gsy: Dr Johann Gfeller vom Thurm. 1859 het de dr Notar Sauzme das Amt überno. De het me afe nümme müesse öppis
z treiche besteue, weme e Brief isch ga hole. 1864 isch d Bahn von Bärn nach Langnou eröffnet worde u Signou het o e Bahnhof übercho. Ds Land für e Bahnbou isch z Signou ohni grosse Kommentar zur Verfüegig gsteut worde – aus erzliberali Gmein isch me am Fortschrift guet gsunne gsy. Es het sogar es paar Signouer gä, wo statt em Gäut für das abträttene Land lieber Aktie vor Oscht-Wescht-Bahn hei wöue – es Jahr später hei si drmit chönne WC-Papier mache. D Bahn isch nämlech nach eme Jahr Konkurs gsy u Bärn het die ganzi Sach müesse zahle. «Oh-weh-Bahn» het mere de gseit. 

1890 isch e Fritz Hofstetter Poschthauter worde und het d Poscht vom Notarehus zu sich heigno. Nume sächs Jahr speter hets scho wieder gwächslet. Dr Notar Ferdinand Althaus het d Poscht überno u se wieder i ds Notarehus züglet. 

Im 1917 isch de o dr Poscht­outokurs vo Signou über Eggiwil uf Röthebach ygrichtet worde u dr Karl Hofer isch 1920 Poschthauter worde. Är het de 1920 es nöis Huus für d Poscht boue. Am Schluss isch ja no d Bank i däm Huus gsy. Hofers sy de lenger Poschthautersch blibe, im 1956 isch ihre Suhn, dr Karl Ludwig Hofer, me het im «Karludi» gseit, Posthauter worde. 

30.05.2024 :: Hans Minder