Ingold hei mit däm Edumetau nüt z tüe

Es git o Familienäme, wo me ufe erscht Aasatz würd säge, das syge sicher kener Ämmitauer. Das passiert bsungersch, we dr Name hie säute vorchunnt, aber inere angere Gägend dä Name rächt hüfig isch. 

Sone Name isch Ingold. Är isch um Herzogebuchsi ume rächt hüfig, sogar im Solothurnische gitsne, aber süsch eigentlech niene. Aber es git ei Usnahm: D Ingold, wo Bürger vo Louperschwiu sy. 

Gfragt nach däm Name het mi e Herr Ingold us em Nöieburgische. Es git vo de Louperschwiuer Ingold nümme grad viu u die meischte wohne im Wäutsche. Die erschte Ingold vo Louperschwiu sy ab 1580 ir Nöimühli. I dere Zyt het me aagfange um die nöii Brügg o Lüt aazsidle, wo Gwärb u Handu i ds Ämmitau hei brunge. Näb de Ingold, wo vermuetlech us em Solothurnische sy uf Zoubrügg cho, isch das o d Familie Wächter gsy, wo zu de erschte Zöuner u Brüggewächter hei ghört. E Andreas Ingold isch um 1620 Bsitzer vom Alischpachguet gsy. 

E Jakob Ingold het 1713 Konkurs gmacht u drby isch uscho, das är gfauschmünzeret het. Normalerwys isch das es Todesurteil gsy, aber bi ihm het me e Usnahm gmacht. Är isch nämlech e usgezeichnete Büchseschmied gsy. Bärn het ne de zure läbeslängleche Haft verurteilt u är isch id Feschtig Aarburg cho, wo är de im Züghuus het müesse schaffe. Är het sogar si Frou chönne mitnäh u im Jahr 1732 hei es paar Ämmitauer d Regierig z Bärn chönne überzüge, dr Jakob zentlaa, unger de Bürger isch sogar der Schärer Micheli vo Langnou gsy. Eine vo dene Nachkomme im Wäutsche isch Uhrimacher worde u het probiert d Produktion z vereinfache u so günschtigi Uhre z mache. Da isch är e chly z früech gsy, das het nid passt, aber es paar Jahrzähnt speter het me de siner Erfindige chönne bruche. No hüt gits z Biel dr «Frédéric-Ingold-Weg» zu sine Ehre. 

Was bedütet dr Name Ingold eigentlech? Mit em Edumetau Guwd hets nüt z tüe – Uhrimacher hin oder här. 

Ingwalt oder Ingolt isch e aute germanische Vorname gsy. Är heisst «der Gott Ingwio söu regiere». Scho um 1300 gits die erschte Ufzeichnige vo däm Name, o ir Region Solothurn. Denn het me no meischtes mit «t» am Schluss gschribe u dr «w» drzwüsche isch o no da gsy. 

Dr «Yngvi» oder «Ingwio» aus Gott isch aus «Freyr» bekannt. «Freyr» het nüt mit Fritig z tüe, für dä Name isch d Liebesgöttin Venus oder germanisch Frigg zueständig. Är isch e Fruchtbarkeitsgott gsy, auso wichtig für d Bure. Me seit ir Saag, dass ds Schwedische Chünigshus vom Yngvi oder äbe Freyr abschtammi. D Stadt Ingolstadt im Dütsche het der Name o vom Yngvi u nid vomene Ingold, wo nach Dütschland usgwanderet isch. 

16.09.2021 :: Hans Minder