Bi däm Bytrag hie, wärdet dir scho vom düreläse zwöi Kilo schwerer - es geit nämlech um Menucharte. Die sy vo öpperem, wo vo 1880 bis 1920 i de beschte Hüser vo Europa het kochet. Zwo vo dene Charte sy usem Ämmitau gsy: Eini vo 1936 vom Schlegwägbad im Jassbach u eini vom Novämber 1912 vonere Hochzyt im Löie z Langnou. Dr Löie isch denn ufem Bäreplatz gstange, dert wos momentan e Parkplatz het. Ghürate hei denn es Frölein Mathys u e Dr. Jakob Züllig. Dr Löie isch eini vo de beschte Adrässe im Ämmitau gsy. We dr Bundesrat im Ämmitau het Gescht wöue bewirte, isch är dert häre gange. Dennzumale het me no nid so serviert, wie hüt. Aues isch ufem Buffet ufbout worde u d Gescht sy i d Chuchi a ds Buffet ga hole, was ne passt het. We eine afe mitere Merängge het wöue aafaa, isch das kes Problem gsy. We ds Täuer isch läär gsy, isch me i d Chuchi use gange u wieder ga reiche. Ufem Buffet vom Löie isch afe einisch e Suppe gstange: Kräbssuppe. Kräbse hets denn i de Bäch vom Ämmitau no hüüfig gha u mänge Chlybuur het aube mitem Fah vo Kräbse, Frösche u Schnägge chönne dr Familie e Näbeverdienscht ermügliche. Bim Fisch het me im Ämmitau einzig d Förli (Forellen) gha. «Forelle Blau» isch de o im Löie uftischet worde, natürlech mitere holländische Sosse. De isch dr erscht Houptgang cho: Rindsfilet «à la jardinière», auso nach Gärtnere-Art. Ds Filet isch brate worde u de mit viu Gmües u Chrüttersosse ufe Bankett-Tisch gsteut worde. Näb däm hets de no e Spys us Teigware, Gmües u Gflügu-Fleischwürfeli gä. «Petits pâtes à la reine» het me däm gseit. Drzue isch Parmesan cho. U drzwüsche het es Sorbet us Champagnier ghä u de när e Rehrügge mit aune Bylage! Salat hets o gha: Salattäuer mit grüenem Salat, chlyne Härdöpfeli, Schinkewürfeli, Pariser Champignons u Sosse! Dir hättet lieber es Dessär? Kes Problem: Näbe de verschiedene Turte u Frücht hets e «Pudding Diplomat» gä. Oder e ufwändige Chueche us Löffubiskuit u Vanil-Eierstich-Füuig. Dert drin hets o kandierti Frücht u Rosineli gha. E süessi Sach. Das würdi gärn einisch nachechoche! Wär o no auti Menücharte hät, sou sech doch mäude (info@wochen-zeitung.ch).