Das isch under Krümpelhütte, wo wägem Gländ eso heisst. / Bild: Bruno Zürcher (zue)
«Chrümpelhütte» heisse zwöi Bärgheimet im Hiuferetau ir Gmein Äschlismatt-Marbach. «Krümpel hütten» fingt me bereits i Dokumänt usem 16. Jahrhundert u chly speter im Gülte-Verzeichnis vo 1648 chame die Sach de o guet verorte. Dert steit nämlech, das d «Alpung genant Thorbach» stossi «an die Krümpel hüdenen». I historische Dokumänt fingt de o no es sogenannts «Zueguet» wo «Chrümpeli» het gheisse u när o no dr «Chrümpelhüttewaud» u dr «Chrümpelhüttegrabe».
Ganz ähnlech, eifach ohni «hütte», heisst es ängs Tääli grad südlech vo Truebschache: «Chrümpugrabe». Das Tääli geit nächer ueche gägem Rämisgummehoger. Im obere Gebiet gits nächär no die ungeri u die oberi «Chrümpuhütte» u de no ds «Chrümpuhüttemösli». O die Liegeschafte fingt me i aute Dokumänt: «die Alp Krümppell» isch 1629 im Turmbuech notiert worde. I de Amtsrächnige vo 1645 steit de scho fasch die hütegi Schrybwys «Krümpelhütten».
O z Schüpfheim hets übrigens früecher o e «Krümpel graben» gä. Dä Ortsname isch aber nümme im Gebruch. D Bezeichnig isch nid grad besser worde, hüt säg me däm Bach «Dräcklochgrabe».
Ganz suber isch hingäge d Dütig vo au dene «Chrümpel»-Ortsnäme. Ds schwyzerdütsche «chrump» stammt vom mittuhochdütsche «krump» ab. Us däm het sech o ds hochdütsche «krumm» biudet. «Chrump» meint aber nid nume «chrumm», sondern o «gchrümmt».
D «Chrümpelhütte» im Hiuferetau isch wäg dr Topographie eso benamset worde. Ds Gländ nimmt dert au Chrümp. Bim «Chrümpugrabe» dörfti dr Bach ds Erschte sy gsy, wo die Bezeichnig het übercho. Dr Grund isch sicher gsy, wüu dä Grabe au müglech «Chrümp» het gno für gäg dr Iufis zue zloufe – vor drü-, vierhundert Jahr sicher no meh aus hüt.
Ganz obe im Chrümpugrabe hani no e intressante Ortsname gfunge: «Krimishalde». I dere Haude heisi äue gärn Krimis gläse. Nobis. «Krimi» isch ender e Churzform vomene Vorname. Aber so eifach chame dä Krimi-Fau nid löse.