Das isch dr letscht Bytrag über d Chronik vom Jakob Friedrich Brugger, wo vo 1824 bis 1837 im Schangnou isch Pfarrer gsy.
I dere Zyt het me schnynbar aagfange Schülerrodu z füehre. Drmit het me chönne luege, wär überhoupt i d Schueu müesst u weler Ching de o sy cho. Das het me nid aune Orte eso gmacht: Im Trueb hani imene Bricht vo 1848 gläse, dass dr Dorfschueulehrer Lüthi froh isch gsy, dass von sine 108 Ching, wo hätte söue cho, nie meh aus 50 glychzytig im Schueuzimmer syge gsy.
Dr Pfarrer het o angeri Theme gha: Zersch mau sit Jahrzähnte isch 1833 o e Schangnouer zu de Töifer gange. Dr David Hirschi im Bochti het la usrichte, dass är itze e Töifer syg. Dr Pfarrer het de gemeint, um dä «Sonderling und Scheinheiliger» sygs nid schad.
Dr Pfarrer schrybt no y, dass i däm Jahr me sogar im Waud u im Buembach heig aagfange mit chäse. Das im Waud het er no chönne verschtaa, aber d Buembacher! Die wärde sich scho vor Änds Jahr Gringe verschllage ha!
1834 schrybt är nume, dass es wägem Wätter nüt heig z schrybe gä. Schön. Dr aut Briefträger vo Zoubrügg syg ja aube o zu aune Burehöf gange o wener gar ke Poscht het ghaa. Är heig de aube gseit «Hüt hani de kee Poscht».
Einisch im Jahr hei au Pfärrer vom Amt i ds Capitu müesse; für d Ämmitauer isch das denn z Burtlef gsy. Ei Pfarrer het e Predigt gha, im 1834 isch das Pfarrer Lüthi vo Rüegsou gsy. Vor Predig het dr Pfarrer Brügger ir Chronik nüt gschribe, erwähnt het är aber, dass d Pfärrer ohne ihri Amtstracht uf Burtlef heige chönne.
Me ghör vo angere Gmeine, wo nöii Lehrer vom Seminar z Hofwyl heige, dass die jede Gloube heige verlore. Si tüege nid emau us dr Bibu läse! Dr Brugger het de usegfunge, dass sogar si Lehrer Hirschi nümme dr Heidubärger Kathechismus tüeg lehre ir Schueu! Aber sogar d Schangnouer Gemeinsherre heige die nöii Schueu gnämiget – är chönn nüt mache, schrybt dr Pfarrer. Dr Statthauter z Langnou tüeg ihm o nid häufe, das syg o eine vo dene Revolutionäre! So isch Schangnou modern worde, dr Pfarrer het chönne mache, was är het wöue.
Dr Gmeinspräsidänt (dennzumale het das Ungerstatthauter gheisse) Christian Schlüechter isch uf einisch revolutionär gsinnt gsy. «Alter schützt vor Thorheit nicht», het dr Pfarrer gschribe. Drfür hets dr Pfarrer dürebrunge, dass ir Schueu nöi o isch gnäiht worde. Drzue het me o e Lehrere aagsteut.
U de hört dr Bricht vom Pfarrer Brugger mitts im Jahr 1834 uf. Är isch no bis 1837 im Schangnou Pfarrer gsy. I vermuete, dass hie es paar Sywte fähle. Ersch viu speter isch das Buech wytergfüehrt worde.