Wie Schlyffschibe sy id Hüüser cho

Grad chürzlech het mi öpper gfragt wäge Schliffschibe. Eine vo sine Vorfahre het nämlech so ne Schybe la mache. Es isch früecher Bruch gsy, we öpper es Huus het la boue, dass d Nachbare hei mitghulfe. I dr Regu hei d Nachbare e Türe oder äbe e Fäischterschybe gschänkt. Es git no so Hüser, wo no fasch aui Türe us dr Bouzyt erhaute sy u wome i de meischte Fäu cha nachläse, wär die Türe het gschänkt. Dr Bruch vo de Schlyffschibe isch im Kanton Bärn öppe so um 1680 ufcho u de e gläbti Tradition worde, bis de im 1798 d Franzose hei d Schwyz eroberet. Unger dr Republikanische Verfassig vor Helvetik het das Wappewäse de e chly abgno. Doch chöme mir einisch zu däm Fäischterglas vom Durs Liechti. Dä Maa isch Bürger gsy vo Louperschwiu u am 10. Mai 1738 gebore. O siner Eutere hei scho im Löie z Louperschwiu gwirtet. Liechtis sy vo 1711 bis 1865 Bsitzer vom Löie gsy. Dr Durs Liechti isch nid nume Wirt gsy, är het aus rächti Hang vom Pfarrer o ds Kirchmeieramt gha u isch drnäbe o Grichtssäss gsy. Wo är 1795 gstorbe isch, het der Pfarrer i ds Regischter gschribe, dass ihm dä Maa wärdi fähle, eine, wo d Gmein so guet kenni, gäbs nid es zwöits Mau. Ds Glas säuber isch öppis vom Tüürschte gsy, wo me bim Bou vomene nöie Huus het müess yrächne. Die Glasverchöifer hei drum o aabotte, dass si so Or­namänt, Wappe u Näme chönni dri tue. D Schybe isch wytuus tüürer gsy, weder d Arbeit für ds Schlyfe. D Vorlag isch uf Papier zeichnet worde. De isch d Schybe druf gleit worde u me het die Sach kopiert, entweder mit Farb oder miteme glüeig heisse Wärchzüüg. Hie im Ämmitau het bsungerbar e Flückiger us dr Region Sumiswaud aagfange mit so Schybe. Dr Glaser Flückiger het um 1750 mit sire Kunscht aagfange. Drzue isch hie ir Gägend o no dr «Hüttebänk» e bekannte Glasmaler gsy. Är het z Moos­affoutere gläbt, isch aber schynbar a de Märite nache. Uf so Schybe hets o viu Reklame. O dr Liechti het näbem Wappe o e schöni Channe u zwe Bächere porträtiert.