Die Louis d’Or-Münze het z me sech chönne verdiene. / Bild: zvg
Über Truebschache isch zersch Mau am 1. März 1783 ir «Gazette de Berne» d Red gsy. Dr Landvogt Gottlieb Friedrich Ith vo Trachsuwaud het nämlech ufe 3. April 1783 e Steigerig aagsetzt gha. Versteigeret worde isch denn dr Nachlass vom verlumpete Händler Ulrich Frank im Dorf Truebschache. Am 31. März 1798, auso churz nach dem Zämebruch vor aute Eidgenosseschaft, het der Dokter Joseph Maria Gissler, Spitaumeischter us Autdorf im Kanton Uri i dr NZZ vo Züri es Inserat ufgä: Är heig bim Heimarsch von Bärn uf Uri e guldigi Repetiersackuhr mitere grüene Schale verlore. Är syg sech zimlech sicher, dass das beim «Abtritt», auso im WC, syg verlore gange. I Frag chömmi da nume ds Wirtshus in Grosshöchstette oder ds grosse Wirtshus im Truebschache, steit im Inserat. Wär die Uhr fingi u umeschicki uf Autdorf, heig de e Louis d´Or aus Belohnung verdient. Wie viu das ir hütige Währig wär, isch no schwierig z säge. Was me aber cha säge: Alleini dr Materiauwärt vo dere Goud-Münze isch um 500 Franke. Im Bärner Wucheblatt vom 18. Ougschte 1804 het dr Vikar vo Truebschache la usrichte, dass ihm e Hung vo wysser Farb syg zuechegloffe. Dr Bsitzer heig zwo Wuche Zyt, sich z mäude, drnaa sygs z spät u dr Hung syg furt. Wo im Mai vom Jahr 1808 ds Dorf Marbach isch abbrönnt, hei d Füürsprütze-Manne vo Truebschachen d Chiuche vo Marbach grettet u o es paar vo de benachbarte Hüser, wie me o inere Zytig het chönne läse. Am 28. Horner 1829 het dr Müller Hans Siegethaler im Truebschache e Publikation im Bärner Wucheblatt gmacht. Är het nämlech es dritts Mauwärch wöue yboue. Das het är nume chönne, we niemmer drgäge isch gsy. W Dir auso weit Ysprach mache, hättet Dir das bis am 23. März 1829 bir Amtsschriberei z Langnou müesse mache.
Im Februar 1830 isch es bsungerbar chaut gsy. Ir Stadt Bärn isch e Maa amene Morge erfrore gfunge worde u im Truebschache het dr Pfarrer uf sim Therometer -23 Grad gmässe.