D Sumiswauder söue da säuber luege

Dass sech d Chorgricht mit Schwangerschafte hei müesse beschäftigte, isch nid grad ussergwöhnlech - dass hingäge e Frou seit, si syg «von der Allmacht Gottes» schwanger, hin­gäge scho. E settige Fau isch 1799 bim Chorgricht vo Sumiswaud glandet. Dr Fritz Jörg het die Sach i sim Buech «Aus dem Chorgericht Sumiswald» churz erwähnt. Gmäudet worde isch die Sach vor Gmein Madiswiu u zwar vo dr «Munizipalität». A däm Wort a gseht me, dass dr Yfau vo de Franzose es Jahr vorhär sini Spure het hingerlaa. Wyter faue eim im Schrybe, wo uf Sumiswaud isch gange, o angeri Wörter uf, wo uf die Revolution häredütet: Da steit aus Überschrift «Freyheit» u «Gleichheit» u aus Aared chame churz u bündig «Bürger» läse. Mit revolutionäre Gedanke het dä Fau süsch nüt z tüe. D Madiswiler hei dä Brief uf Sumiswaud gschickt, wüus i dere Sach um ne Sumiswaudere geit. Si heige nämlech «mit grösster Bestürzung» vernoo, dass «eurige» Elisabeth Schütz, wo z Madiswiu bim «Hans Stekli» läbi, schwanger syg. D Madiswiler hei sech dere Sach aagnoo, u sy die Frou ga befrage. Si het usgleit, dass si nid chöni «läügnen», dass si schwanger syg. Chly usfüer­lecher isch de d Antwort uf d Frag nachem Vater: «Es seye ihr schon zu Pfingsten geoffenbaret worde, dass sie von der Allmacht Gottes Worte schwanger worden, und diese Schwangerschaft habe auf Verenen Tag ihren Anfang genommen», steit ir Mäudig, wo d Madiswiler auf Sumiswaud

hei gschickt. Dä Brief isch am 8. Jäner 1799 geschribe worde, de wär die Frou guet vier Monet schwanger gsy. Die zwe Manne us Madiswiu, wo d Befragig hei düregfüert, hets aber düecht, dass die Berächnig nid chönn stimme; si syg scho «gross schwanger». Die Manne, wo die Ungersuechig hei gmacht, hei äue o scho ds einte u angere erläbt u hei sech o ihrer Gedanke gmacht. Offebar si sy drvo usgange, dass die Elisabeth Schütz nid vom Steklj schwanger syg, wo si het gwohnt, sondern vomene angere Maa. Uf au Fäu hei si de no d Bemerkig i dä Brief gschribe, dass si ds Gfüeu heige, dr Steklj heig öppis mit dere Schwangerschaft z tüe - aber si wöue itz die Sach am Chorgricht Sumiswaud übergä. Im nächschte «Vo früecher» geits de wyter.