Es git uf em Internet d Syte www.e-newspaperarchives.ch wo me auti Zytige cha läse. Die Zytige gö zrügg bis öppe um 1690 - auso chly wyter aus es die Zytig hie git. D «Gazette de Bern» zum Byspiu fat am 2. Jäner 1692 aa u es isch scho no bungersch, dass die Bärner Zytig isch uf französisch gschribe worde. I ha uf däm Portau einisch «Langnau» ygää. Dr erschte Artiku isch vom 19. Oktober 1769 u isch im «Feuille d´avis de Neuchatel» erschine. E Ulrich Buchschacher vo Langnau het es Inserat drin gha, är fahri au Donnschtig mitemene Wage vo Bärn uf Nöieburg. Wär Ware wett mitgä, söu die bim Jean Junod z Nöieburg abgää, u de näm är die am Donnschtig mit uf Bärn. Är heig sogar Platz für Lüt u die müesse 15 Bärnbätze pro Person zahle. Am 10. Ougschte 1774 het «Gazette de Berne» gmäudet, dass me z Bärn bim Herr Dick chönn Porträt choufe; öppe vom Künig Louis XVI oder o vom Dokter Michael Schüpbach vo Langnou. U im «Berner Wochenblatt» vom 20. Apriu 1776 hets gheisse, dass dr Bartli Bieri vo Langnou wäge sim liederleche Läbeswandu syg bevogtet worde. Dr Johann Schöni, dr Büchseschmied uf dr Gartegg, isch sy Vormund worde. Am 23. September 1808 het dr Pfarrer vo Langnou no im Wucheblatt la schrybe, dass me für d Schueu im Hühnerbach e Lehrer suechi. Wär Inträsse heig, heig am Namittag am eis im Pfarrhuus z Langnou z erschyne, de wärdi dr Pfarrer die Kandidate prüefe. Am 11. Septämber 1808 isch im Wucheblatt gstange, dass am Grichtssäss Johann Lemann e Hung syg zuechegloffe. Är syg schwarz mit emene wisse Ring ume Haus u vo mittlerer Grössi. Wär auso dä Hung vermisst, söu sech bim Grichtssäss mäude. Weder dä Hung nid kennet, de viellech dr Bürger Hans Ulrich Röthlisbärger vo Langnou. Dä isch im Herbscht 1800 z Uttige im Dienscht gsy, u het dert d Magd Schafroth gschwängeret. Aues Forsche het bishär nüt gnützt, dr Röthlisbärger isch niene z finge gsy. O hie steit im Wucheblatt: We öpper dä Burscht kenni, söu me sech am Distriktsgricht Oberämmitau mäude.