Hiwyse ufe Tourismus chame o i verschiedene aute Dokumänt finge. Aber o im Lied, wo aus Ämmitauer Nationauhymne isch bekannt worde:
«Niene geit´s so schön u lustig
Wie daheim im Ämmetal
Dert ischs allergattig Rustig
Dass eim schwär wird d Uswahl:
Manne het es ehrefesti
Wyber brav u hübscher Art
Meitschi – we d se gsehst so hest di
Dry verliebt – so schön u zart»
I dr äue eutischte Fassig us dr Mitti vom 19. Jahrhundert, wo vom Schlosser Wiedmer vo Signou isch gschribe worde, isch nämlech eini vo de sibe Strophe quasi de Tourischte gwidmet. I dr zwöitletschte Strophe heissts nämlech:
«Chunnt de albe Angiländer –
U süst Herrschaft au dahär,
Tragi d Fräuli goldni Bänder
U derglyche Zierat mehr;
Hei si Diener – hei si Wächter –
Sy si hübsch u rych drby,
Müeßt en Ammetaler Tächter
Mir doch gäng no lieber sy»
D Ängländer sy auso nid nume i ds Bärner Oberland – si hei o ds Ämmitau entdeckt. I ha imene Dokumänt usem Jahr 1887 gläse, dass ds Ämmitau e Wanderfüehrer söu übercho. Vomene «Wanderbuch für Touristen, Kur- und Pensionsgäste» isch da d Red. Dr Verlag Huber & Co z Bärn heig dä Füehrer wöue usegää. Usdrücklech isch i dere Aazeig erwähnt, dass bis denn no niemmer e sone Füehrer heig usegää – äs gäb gar nüt settigs. I de bishärige Reisefüehrer syg meh oder weniger gar nüt über ds Ämmitau drinne. Dergäge chönn me für Gägende wie ds Oberland Reisebüecher i aune Sprache ha, isch i dere Aazeig wyter z läse. Ds Dumme a dere Sach: Bis hüt hani aber das Buech no
nie gseh! I cha auso nid säge, öb dä Ämmitauer Reisefüehrer überhoupt isch zstand cho. Es paar Reisendi sy aber glych
i ds Ämmitau cho. Wandere u Kure i de Bedli u natürlech guet Ässe sy beliebt gsy. Die Lüt hei de o gäng aune Verwandte u Bekannte e Poschtcharte gschribe. Die sy i dene Jahre (so ab 1880) so richtig ufcho u me fingt no hüt e grossi Mängi vo dene Charte. Weme die vom Schangnou aaluegt, de geseht me, dass uf viu meh Charte dr Poschtstämpu vom Kemmeribode druffe isch aus dä vo Schangnou säuber.