E länge Acher isch gäbiger

Viu Ortsbezeichnige sy wäge dr Form vom Gländ entstange. Vo Wytem ufgfaue isch de Lüt zum Byspiu e längi, markanti Egg. So fingt me «Langenegg» oder «Längegg» i verschiedene Gmeinde im Gebiet vor «Wuche-Zytig»: Langnau, Äschlismatt, Schüpfheim, Signou, Oberdiessbach oder Truebschache. Uf dene imposante Ahöchine stöh zum Teu o grad mehreri Heimet, so dass es a mehrere Orte o no dr Zuesatz «ober» u «under» git. Ganz viu vo dene Bezeichnige sy scho rächt aut. «Längegg» ir Gmein Schüpfheim, wo südlech vom Dorf uf guet 1400 Meter über Meer obe ligt, isch bereits im 16. Jahrhundert notiert worde. Äbefaus ganz mängisch fingt me «Längacher». Scho vor Jahrhunderte isch e länge Acher gäbig gsy, weme nid aubot mit de Ross oder Ochse het müesse cheere. Dr Ort Längacher im Wase hinger fingt me scho imene Dokumänt usem Jahr 1389 u zwar isch e «Elli am Lengenacher» erwähnt. No fasch meh fingt me im Gebiet vor «Wuche-Zytig» dr Ortsname «Längmatt» - es git ja über aues gseh o viu meh Matte aus Ächer. I historische Dokumänt touche die länge Matte aber meischtens nume uf, we es ganzes Heimet eso benamset isch worde. So ne längi Matte gits unger angerem im Eggiwil, die isch yklemmt zwüsche dr Ämme u am Waud gägem Houzbach ueche. Fasch glych isch d Situation bim Heimet «Längmatte» bi Marbach, nume dass dert natürlech nid d Ämme sondern d Ilfis dürelouft. Dä Ort isch scho imene Dokumänt usem Jahr 1342 erwähnt; dert geits umnes Guet «daz da heiset an der Matton». Grad obedranne isch e einzigartige Ortsname mit «läng». «Längeschilt» e Weid, wo chly usgseht wiene Schilt u drumum hets Waud. Äbefaus aut beleit sy zwöi Heimet, wo ds Gebiet nid nume läng sondern o äben isch. Scho imene Urbar vo 1531 isch dä Ort mit «vff ebenn lenng» gschribe worde. No ganz gmüetlech tönt dr Ortsname «Längbett». Wär dert wott schlafe muess eifach ine Matte lige. Gmeint isch nämlech Land im Gebiet Churze­hütte ir Gmein Flüehli.