Spezieui Böim mit spezieue Frücht

Itz gheie si de scho bau ume ache, d Nüss vo de markante Nussböim. I dr Gmein Sumiswaud hets offebar früecher viu settig gha. Im Wase hinger fingt me mehreri Ortsbezeichnige, wo uf settig Böim häredüte: «Hornbachnussboum», «Nussboumschachen», «Nussboumschattsyte» u «Nussboumbärg». Die Böim cha me ja o chuum überluege, sie wärde freistehend bis 25 Meter höch - kes Wunger, het me früecher e Ort benamset im Sinn vo: «dert, wo dr Nussboum steit.» Nussböim chöi uraut wärde, i dr Literatur isch vo bis 160 Jahr d Red. Das heisst aber o, dass de scho mau öppis cha gwächslet ha, weme chly wyter zrügg luegt. Uf aute Charte isch zum Byspiu bi de Nussboum-Orte im Wase o no vo «Inner Nussboum» d Red u mit «Nussbaumberg» isch o dr «Schienberg» gmeint gsy, wo wyter obe isch. Historisch sehr guet beleit isch ds Heimet «Nussbe», wo uf dr Aahöchi zwüsche Sumiswaud u Heimisbach ligt: «dz gut zem Nussbovme» isch im Jahr 1348 notiert worde. U 1389 isch de klar feschtghaute worde, wäm das Guet ghört: «Wernli zem Nusboum». Äbefaus autbeleit isch «Nussberg» ir Gmein Flüehli. Näbscht de Heimet gits obedranne o d «Nussbergflue». Grad es paarmau gfunge hani wyter «Nussboumacher», nämlech z Hütlige, z Chonufinge, z Mirchu, z Waukringe u zu Bigle hani e aute Ytrag mit «nußboum egertly» gfunge. «Ägerte» isch ja o ne Art Acher. «Nüsser» gits aus Ortsname nume grad einisch ir ganze Schwyz, u zwar ir Neechi vom Hüpfebode ir Gmein Truebschache. Die Bezeichnig syg entstange, wüus bi däm Heimet aube viu Hasunüss heig gha. Mit Wort «Nüss» chöi auso verschideni Arte vo Nüss gmeint sy. Was bi aune Nüss ds Glyche isch, me muess no chly grüble, bis me a ds Feine drininne chunnt. Intressant isch hie no, dass ds schwyzerdütsche Wort «grüble» im Sinn vo «me muess chnorze, bis me zum Chärn chunnt» e Zämehang mit de Nüss het. Früecher het me nämlech o vo «Grübelnüss» oder «Gribelnüss» gredt.