Chöme d Mörker äch vo Mauritius?

Zwüschyche gits gäng wieder Aafrage wäge Familienäme. Aus Bürger vo Langnou gits dr Familiename Mörker. Da bini gfragt worde, was das ächt chönnt bedüte? U dr Herr Mörker isch o chly irritiert gsy, wüu ufem Familiewappe e Schwarze z gseh isch. I ha die Familie z Langnou sit 1608 gfunge. Denn het e Bänz Möriker e Barbara Rupp ghürate. Äbe e Möriker u nid e Mörker. Die Verchürzig gits ersch sit öppe 1750. Möriker isch e Härkunftsname vom Dorf Mörike-Wildegg im hütige Kanton Aargou. Ds Gemeinswappe vo Mörike-Wildegg isch ähnlech, aber der Chopf vom Afrikaner luegt gäge füre. Itz isch es eso, dass die erschte Möriker z Langnou genau us däm Dorf stamme. Vom Jahr 1415 a het das Dorf zu Bärn ghört u zwar bis zur Gründig vor Helvetische Republik im Jahr 1798. Die Verbindig chani o nachewyse wüu im 1670 e Pfarrer Möriker z Louperschwiu isch gsy u si Brueder, Isaak, aus Weibu u Sigrischt. Dä Isaak isch de 1672 uf Langnou. D Familie Möriker isch z Langnou erfougrych gsy. Si het vom Staat Bärn 1663 e Konzession übercho für ne Färberei u Bleicherei z gründe. Im Jahr 1702 isch e Samuel Möriker zum Pfarrer vo Louperschwiu cho u het bychtet, dass är a däm verbottene Tanzet im Längebach o syg drby gsy. Är tüeg die Straf grad zahle, drfür söu me am Pfarrer vo Langnou nüt mäude - süsch überchöm är de Problem mit sire Frou. Dr Pfarrer het das Gäut verbuechet u die Sach isch erlediget gsy. Möriker oder Mörker chunnt auso vom Ort Möriken-Wildegg. U Mörike chunnt vom Heilige Mauritius. Dä syg mit sine 6000 Legionäre, wo aus Chrischte syge gsy, im hütige St.Maurice im Wallis aus Märtyrer gstorbe. Dr Heilig Mauritius wird geng aus Afrikaner dargsteut. Är isch aber eigentlech e Ägypter gsy. Dr Vorname Moritz chunnt o vo Mauritius, genau glych wie d Familiennäme «Moor» oder «Mohr». D Republik Mauritius im Indische Ozean het dr Name vom holländische Entdecker Wybrand van Warwijck übercho, wo die Insle am Prinz Moritz vo Oranien gwidmet het.