Im Gebiet Rislau geits stotzig z dürache. / Bild: Bruno Zürcher (zue)
Ds Wiehnachtslied «Es ist ein Ros entsprungen» dörfte äue die meischte kenne. Das Lied stammt im Originau usem 16. Jahrhundert u bezieht sech thematisch ufe Värs 11.1 vom Jesaja. Dert steit sinnbiudlech, dass useme Boumstumpf e junge Trieb wärdi wachse, wo drmit natürlech dr Jesus gmeint isch. Ir Bibu steit de äbe nid «Ros» sondern «Reis».
Ds Wort «Reis» het ganz auti Wurzle. Scho i dr germanische Sprach hets das gä: «hreisa». Da drus isch när ds authochdütsche «(h)ris» entstange u us däm ds schwyzerdütsche «Riis». Ortsnäme zu däm Wort hani nume grad ei einzige gfunge im Gebiet vor «Wuche-Zytig» u dä het mit dr Wiehnachte eigentlech nüt z tüe: «Bäseriser». So heisst e Steu ir Gmein Arni, wo äube isch Bäseriis geschnitte worde. Für d Bäse het me aube vor auem Riis vo Birke oder Erle gno. Es git aber no es paar Ortsnäme meh, mit «Riis». Obschon, dass das Wort eigentlech glych usgseht, isch dr Ursprung aber e angere: ds schwyzerdütsche Verb «rîse(n)». Was isch drmit gmeint? So het me gseit, weme Houz oder o Höi dür ne natürlechi oder o künschtlechi Chrinne het la ache rütsche. Für ds Houz sy zum Teu äxtra ganzi Kanäu us Houz bout worde, für dass de die Trämmle zügig ache zibet sy, ume nid geng mitem Zappi het müesse ga nüdere, was natürlech henne gfährlech isch gsy.
«Risshalden» ir Gemein Louperswiu chönnt so e Ort sy. Oder o «Rislau» grad bir Lüdere. Dä Ort isch scho i de Amtsrächnige vo 1707 erwähnt. Dert isch o guet müglech, dass früecher o Höi eso isch ytaa worde. Churz u bündig «Risi» heisst e Ort grad bimene stotzige Grabe im Howaud ir Gmein Röthebach. I däm sehr grosse Waud isch früecher sicher Houz z dürache griesteret worde u när unger bir Waudmatt gäge Röthebach gschleipft worde. Näbscht «Risi» fingt me wyter obe no «ober Risi». Dert, wo de das Houz glandet isch, het mes de chönne lagere füre Wytertransport. «Risbode» heisst e glägne Bärgrügge im Tau vo dr Fontanne, grad ar Gränze vo Schüpfheim u Äschlismatt. U imene Dokumänt vo 1598 isch e Ort bi Raufli aus «ryßgrundt» bezeichnet worde.