D Poscht u d Bahn sy zämeghanget

Vo 1877 bis 1911 isch e Frou Poschthautere vo Zoubrügg gsy, d Anna König. Das e Frou dä Poschte überchunnt, isch denn­zumale scho zimli säute gsy. Di erschte Stämple vo Zoubrügg sy so Baukestämple gsy mit «Zollbrück» gschribe. 1866 hets de mitem Poschtbüro o e nöie Stämpu gä, wo rund isch gsy.  Die Stämple vo Zoubrügg fingt me de o hüfiger, wüu über Jahrzähnte d Gmeinschrybereie vo Louperschwiu u Rüederschwiu sy zäme gsy. I beidne Gmeinde isch nämlich dr Notar vo Zoubrügg o grad Gmeinsschryber gsy. Z Louperschwiu u z Rüedersch-wiu hets de speter o e Poschtablag gä. I beidne Orte isch das ir Wirtschaft gsy, auso i de beide «Löie», wos i dene Dörfer het. Speter isch de no d Poschtablag z Raufli eröffnet worde. Am 12. Mai 1881 isch de die nöji Ysebahnlinie vo Burdlef i d Obermatt bi Langnou ygweiht worde. Dert ir Obermatt hei de d Züüg i ds Gleis vor Ysebahn Bärn–Langnou chönne yspure. Die Linie isch zersch vor «Ämmitaubahn» betribe worde, im 1942 isch de d Fusion vo de Ämmitauer Bahne zur «Emmental-Burgdorf-Thun-Bahn» bschlosse worde. Das wär de auso d EBT gsy. Sit 2006 ghört das aus zur BLS. D Eidgenosseschaft het auso die Bahnstrecki dür ds Ämmitau nid so aus wichtig aagluegt – süsch würd das itz der SBB ghöre. Es he sech z ersch nid gross Gwärb aagsidlet z Zoubrügg, aber de mit de Jahrzähnt isch das Dorf geng grösser u bedütender worde u isch hüt eidütig ds wirtschaftleche Zäntrum vo de beide Gmeinde Loupersch-wiu u Rüederschwiu. «Normali» Lüt hei dennzumale nume ganz weni Briefe gschickt.  E grosse Teil vor Poscht us dene Gmeinde isch sicher Verwautigs-Chram gsy. Ganz viu hani Schrybe gfunge, wäge de arme Lüt, wo uswärts hei gwohnt u die angere Gmeinde hei Rächnige gschickt. Bis 1861 hei nämlech d Heimatorte für ihrer Lüt, wo uswärts gwohnt hei, müesse zahle, we die armegnössig sy worde. Wie bi angere Ämmitaler Gmeinde o hei Louperschwiu u Rüederschwiu viu Lüt i angerne Gmeinde gha. U i dene Briefe isch de aube o grad aadroht worde, dass me de süsch die arme Louperschwiuer u Rüederschwiuer mit dr Bättlerfuehr tüeg heischicke.