D Bezeichnige vo Flüss ghöre zu de eutischte überhoupt. Si sy mängisch so aut, dass me hüt kener schriftleche Queue meh vo de Afäng fingt. Im Fau vo dr Chise isch das uf au Fäu eso. Dr Ursprung vo däm Name geit sicher uf die germanischi Sprach zrügg. U dr Flussname isch de o zum Ortsname worde: «Kiesen». Das Dorf isch scho im 13. Jahrhundert aus «Chisun» oder o «Chison» erwähnt. Aber, was heisst da «scho»?!
D Bezeichnig vo däm Gwässer isch denn sicher scho meh weder tuusig Jahr aut gsy. Vo däm här isch es gar nid so eifach die Sach z düte. Usem Germanische isch de nadisnah die dütschi Sprach entstange. Am wahrschynlechschte isch vo däm här scho, dass dä Begriff zum authochdütsche Wortstamm «kisa» ghört, wo me aus «chiesig» oder «die Chiesfüehrendi» cha übersetze. Weme zwar hüt dä Fluss eso gseht, de düecht eim vor auem im obere Teu, dass das Wasser überhoupt nid viu Chis transportiert. Aber wyter unger louft de d Chise ja o chly gleitiger, so dass es meh Materiau mitschriist u de hets äue aube z Chise, dert wo ds Wasser id Aare louft, scho chly Ablagerige gä. Aber wie das vor tuusig oder zwöituusig Jahr het usgseh, wüsse mir ja nid genau. D Chise het i viune Fäu o aus Orientierig u March gulte. So isch es Grundstück ir hütige Gmein Mirchu im 15. Jahrhundert mit «an die Kiesell» beschribe worde u imene Urbar vo 1547 isch e Ort mit dr luschtige Schrybwys «an die kissen» umschribe worde. Me fingt wyter grad es paar Matte, wo ar Chise sy gläge. Eini z Herblige isch imene Urbar vo 1531 mit «an den kiszmatten» notiert worde. Äbefaus isch d Bezeichnig «der kiszacher» glöifig gsy. Wes e Fluss het, isch e Brügg gäbig. D Chisebrügg z Mirchu isch autbeleit, genau glych wie «Kisen-staeg» imene Urbar vo 1531.
Luschtig isch o no, dass es offebar dr Klang vor Chise bis ine Ortsname brunge het. Zwüsche Zäziwiu u Gmeis gits ds Huus «Ruscheli». Die Bezeichnig gits im Gebiet vor «Wuche-Zytig» nume grad dert. Das Huus ligt grad am Ufer vor Chise u d Bezeichnig dörfti würklech entstange sy, wüus dert aube lut tuet rusche, we d Chise chly höch chunnt.