Ds Gebiet Dicki isch wäge dr Gruebe wytume bekannt. / Bild: Bruno Zürcher (zue)
Ds Gebiet Dicki i dr Gmein Hasli isch viune Lüt e Begriff.
U viu Lüt wohne imene Huus, wo ds Grien füre Beton vom Dicki chunnt. Dert gits nämlech eini vo de gröschte Gruebe im Gebiet vor Wuche-Zytig. Hets dert äch ganz dicki Steine? Oder isch dr Bsitzer vo däm Gebiet e chly feiss gsy?
Afe einisch cha me säge, dass «Dicki» für ne Ortsbezeichnig no gar nid so aut isch. Früecher isch dert nämlech o d Bezeichnig «Hoschürli» gebrüchlech gsy. U ds Wort «dick» het früecher chly e angeri Bedütig gha aus hüt. Im Fau vom Dicki z Hasli isch es eso gsy, dass dert uffäuig viu Gras oder Gwächs gwachse isch – es isch dick gstange. Hüt kennt me die Bedütig nume no im Waud: We d Tanndli äng binang stöh, de seit me däm Dickicht.
Woni so über ds Dicki ha nachegsinnet, isch mir no e zwöite Ort mit «D» am Aafang i Sinn cho, wos äbefaus e Gruebe het: «Diepuspach» bi Äschou ir Gmein Eggiwiu. Die Ortsbezeichnig het scho e lengeri Reis hinger sech. «Dieboltsbach» isch 1372 imene Dokumänt notiert worde, u imene Protokou usem Jahr 1424 steit «Diepoltzbach». Scho fasch die Schrybwys vo hüt isch i de Amtsrächnige vo 1668 brucht worde: «Diepoldsbach» mit em Zuesatz «Grichts Signauw». Nid nume ds Tau mitem Bach isch autbeleit, sondern o dr Wyler: «Diepoltzwil» isch unger angerem um ds Jahr 1400 im Udelbuech ufgschribe worde.
Die Ortsnäme gö ufe Personename Diepold zrügg. Aber was bedütet dä? Es isch eso, dass dä o scho isch aapasst worde. Dr Ursprung isch dr authochdütsch Name «Dietbold» u dä isch us zwöi Wörter zämegsetzt.
Im erschte Teu chunnt ds Wort «Diot» vor, wo germanischi Wurzle het u so viu wie «Volk» bedütet. Dr Ursprung vom zwöite Teu isch ds Adverb «bald», wo aber nid «bald» im hütige Sinn meint. Das Wort isch im Mittuauter angersch brucht worde; «bald» oder o «pald» bedütet «küehn» u «starch». Zämegfasst chame auso säge «Diepolt» bedütet «starchs Vouk».
Obschon dä Name im Mittuauter offebar nid säute isch gsy – me fingt im Bärnbiet no es paar Byspiu – gits süsch niene im Gebiet vor Wuche-Zytig e Ortsbezeichnig mit däm Name dinne.