«Dessikofe» heisst e chlyne Wyler, wo scho viu Lüt näbedüre gfahre sy, ohni z wüsse, wie die zwöi Heimet grad ar Houpt-strass zwüsche Chonufinge u Oberdiessbach heisse. Drby isch das e sehr exklusivi Bezeichnig – die gits nämlech ir ganze Schwiz nume dert. Dass das eso isch, ligt sicher o da dranne, dass es dä Wyler scho sehr lang git. Ds eutischte Dokumänt, wo dä Ort erwähnt isch, stammt usem Jahr 1275. E «Conradus» u e «Wernerus» heige e Bsitz, wo a «Tezecon» gränzi. Scho im nächschte Dokumänt, das isch vo 1336, isch dä Ortsname chly angersch gschribe worde: «Tessekon». Dert steit wyter, dass e «Waltherus» dr Bsitzer vo däm Bureguet syg u o ds Wort «Wiler» isch bereits erwähnt.
Scho fasch die hütegi Schribwys fingt me de imene Dokumänt vo 1378: «Thesikoven». Das geit
när i däm Stiu wyter. «Thessigkhoffen», «Dessykhoffen», «Dessigckhoffen».
Ir Mitti vom 17. Jahrhundert het e bekannti Persönlechkeit dert gläbt. «Hanns Moser, weybel zuo Thessikoffen» isch 1639 notiert worde. Dä hets no wyter brunge: «Hanns Moser, ammann zuo Dessickhoffen, gericht Hünigen, kilchöry Diessbach». No hüt sy übrigens Moser, diräkti Nachfahre vom Ammann, z Dessikofe daheime.
Die hütegi Schribwys «Dessigkofen» hani «ersch» im Topographische Atlas vo 1871 gfunge. Ds Land gäge d Chise heisst «Dessikofemoos» u dr Waud obe drann logischerwys «Dessikofewald».
Es wär itz natürlech spannend, z wüsse, wie me däm Wyler i 200 oder 300 Jahr seit. I ga drvo us, dass die Bezeichnig wyter no chly änderet. Das isch ja hüfig eso bi Bezeichnige, wo me sech eigentlech nümme viu cha drunger vorsteue.
Dr Ursprung vom erschte Teu vo dere Bezeichnig isch nämlech e mittuauterleche Personename, wo sicher no nie inere Hitparade vo de Babynäme isch uftoucht: «Tasso». Dr zwöit Teu – «-ikofen» – isch e Abchürzig vo zwöine zämegsetzte Wörter: «ing» das meint «Ding» oder einfach «Bsitz» u «kofe» chunnt vor authochdütsche Mehrzauform vo «Hof». So, itz syter im Biud. U für die, wo chly d Übersicht verlore hei: «Dessikofe» meint «dert, wo d Familie vom Tasso ihrer Höf het».