221 Soudate hei die föif Gmeinde brucht

1722 het Bärn nöii Uszugs-Rödu gmacht. I dene Rödu isch ygschribe worde, wär im bärnische Militär für was zueständig isch u weli Gmein wie viu Soudate muess steue. Uf dere Lischte sy aui Soudate u Offizier samt Wohnort notiert worde. Für d Gmeinde Signou, Eggiwiu, Röthebach, Langnou u Schangnou hani so es Verzeichnis übercho. Die föif Gmeinde hei 221 Soudate müesse liefere. Vo Froue isch natürlech nüt z läse. 

Dr zueständig Houptme isch e Bärner gsy, dr «Herr Wohledelster Junker Johann Carolus Steiger, Herr zu Rolle im Waadtland». Erstuunlech isch, das är dr einzig Bärnburger isch uf dere Lischte. D Offizier sy nämlech Ämmitauer gsy. D Steuverträter vom Houptme Steiger sy dr Ueli Tschanz, dr Chrischte Steiner in dr Ey u dr Niklous Stauffer im Schweissberg gsy. 

Dr Venner, auso dä, wo Fahne treit het, isch e Melchior Röthlisberger vo Langnou gsy. Dä hani scho mau inere Familieforschig gfunge. Är isch dr Bsitzer vom Guet Längebach bi Louperschwiu gsy. E Hans Siegethaler vom Schlapbach isch dr zwöit Venner gsy u dr Fourier, dr Samuel Kobel im Leen. 

E Niklaus Schänk «zu Oberoutere» u e Daniel Ramseyer im Netschbüel sy zueständig gsy für d Waffe u vier Wachtmeischter hei für Ornig z sorge gha: dr Mathys Blaser vo Langnou, dr Peter Wüthrich ufem Chapf, e Ueli Blaser vom Fambach u dr Peter Dummermuth bi Linde. 

O e Fäud-Schärrer isch uf dr Lischte gsy, das wär hüt e Militärarzt. Hans-Ueli Losenegger het är gheisse. Das isch e Nachkomme gsy vomene Noe Losenegger, wo aus Bärnburger isch Landschryber gsy z Signou. Dummerwys het dä sech denn ine Buretochter verliebt u drum ds Burgerrächt vo Bärn verlore u isch dür das Signouer Bürger worde. 

E ganz wichtige Poschte isch dä vom Schwärtträger gsy. Är het d Ufgab gha, ds Regimätsschwärt z trage. Dä Poschte het 1722 dr Daniel Fankhauser vom Neuenschwand im Eggiwiu gha. 

I dr Militärmusig vom Aute Bärn hets Trummler u Pfyffer gha: d Trummler sy gsy dr Josef Zur Flüh vom Eggiwiu-Schache, dr Ueli Hofer, dr Fritz Röthlisberger vo Langnou u dr Jakob Stucki im Loo. D Pfyffer: Jörg Schänk im Fuhre u dr Chlous Röthlisberger im Katzbach. Die meischte Trummler u Pfyffer hei früecher aus Frömdelegionäre Dienscht ta.