Ufem Teebärg steit dä Stau für d Sümmerigsguschti. / Bild: Ulrich Steiner (uss)
«Tea-Time» hets offebar aube wyt hinger im Hornbachgrabe gheisse. Dert gits nämlech e Ortbezeichnig, wo ender i ds Rych vom Chünig Charles u sine Ungertane passt: «Teeberg». Es «Tea-Room» suecht me dert obe aber vergäbe. Mit Teebärg wird e Weid u drzueghörig Summerstau benamset. We o nid grad britisch, de isch doch ömu dä Ortsname sehr exklusiv: Es git ne nämlech niene süsch ir ganze Schwyz.
D Dütig vo dere Bezeichnig isch zwar nid grad undurchsichtig wie Schwarztee aber doch nid ganz klar. Afe einisch chönnt die Bezeichnig entstange sy, wüu dert viu Teechrut gwachse isch. Itz isch nume no d Frag, welches Chrut da gmeint isch? Dr Dialäktforscher Emanuel Friedli us Lützuflüeh (1846 – 1939) het gschribe, dass mit «Teechrut» vor auem dr Fäudthymian gmeint syg.
Müglech isch aber o, dass d Bezeichnig vo dere Weid im Louf vor Zyt isch umdütet worde, wüu me ds ursprüngleche Wort gar nümme het verstange. Wüus aber fasch kener Belege het, wie die Ligeschaft früecher het gheisse, muess me da Tee treiche u abwarte, bis besseri Dokumänt fürechöme.
Fasch glych ligt dr Fau bim «Teehüsli». Eso säg me anere Gländesteu ir Region vo Bärgstation vom Schiilift Rossweid z Sörebärg. An sich isch die Ortsbezeichnig schnäu erklärt: Das isch ds Hüsli, wos Tee git. Aber: Dert heigs gar nie es Hüsli gä, säge die Yheimische. Müglech isch, dass es dert früecher e gäbige Raschtplatz het gha, wo d Wanderer gäge Durscht e Schluck Tee hei trouche.
Bim «Münzebödili» isch de die Sach scho klarer. Dert dörftis uffäuig viu Münze ha gha. Öb das hüt no so isch weissi nid. Das Bödili fingt me äbefaus z Sörebärg; ir Neechi vor Bärgstation vom Sässulift gägem Steinetli. Im Äntlibuech syg vo de vile Münzearte vor auem d Rossmünze (Mentha longfolia) brucht worde für Tee – u für Schnaps.
Ortsnäme mit «Schnaps» sy rar. Es git sicher mänge Ort, wo mündlech so bezeichnet wird, wüu dert dr eint oder anger, töif id Fläsche gluegt het. Ir Gmein Oberhünige gits aber ds «Schnapserwägli». Dert düre isch me früecher zumene Bad gange, wos bekanntlech o nid nume Wasser het gä.