Tämple us dr Zyt vom Salomo?

Imene Tämpu residiere, das wärs.
Für ne Burefamilie im Dürrebachtau ir Gmein Äschlismatt-Marbach isch das ganz normau. Ihres Heimet heisst nämlech «Dürrenbachtempel» oder eifach «Tämpu». We me när das Gebäude gschouet, de gseht me zwar ke Tämpu – wie me se öppe us Griecheland kennt, mit höche Süüle, aues us Stei – sondern es stattlechs Burehuus samt Wohnstock. Dass me dert ke Tämpu fingt, erstuunt nid. D Bezeichnig dörfti nämlech wägeme Gländeuslöifer e chly hingerem Heimet entstange sy, wo no hüt «Tämpel» heisst. Das Wort isch i Ortsnäme für Steue brucht worde, wo chly erhöht – fasch e chly erhabe – gwürkt hei.

Bi däm Heimet im Dürrebachtau isch das sicher scho lenger eso. Dr Ortsname fingt me uf au Fäu o scho i de Landschryberprotokou. 1772 isch däm Papier es Weidli beschribe, wo zum «düren bach tämpell» ghöri. Imene wytere Dokumänt usem Jahr 1801 steit de churz u bündig «tämpel».

Im Gebiet vor «Wuche-Zytig» gits no e zwöite Ort, wo «Tämpel» heisst. Dä isch de passend ganz ir Neechi vom Piugerwäg, wo vo Schüpfheim gäge Heiligchrüz uechefüehrt. Die bewaudeti Aahöchi nördlech vo Heiligchrüz heisst eso. Die Ortsbezeichnig, wo mitem Wahlfahrtsort nüt z tüe het, fingt me scho imene Gülte-Verzeichnis usem Jahr 1727. Dert isch nämlech es «thämpel güötle» erwähnt u das gränzt «nitsich» (nidsi) ad «ob killen weid» (die oberi Kilchenweid). Intressant a däm Güetli isch no, dass aus Bsitzere e Frou notiert isch worde: «Anna Fuchsen». Das isch im Jahr 1727 eher usser-

gwöhnlech gsy.

Me cha auso säge, a dene zwe Ört, wo Tämpu heisse, sy nie settigi Gebäude gstange.

E Tämpu bout het hingäge dr Salomo, u was für eine. Är het das äbe nid im Ämmitau oder Äntlibuech gmacht, sondern z Jerusalem. Warum verzeuenech das? Wüus im Gebiet vor «Wuche-Zytig» nume ei Ort git, wo eso heisst: Ds Heimet «Salomon» im Hornbachgrabe ganz hinger ir Gmein Sumiswaud. Wie die Bezeichnig isch entstange, isch nid ganz klar; es het fasch kener historische Belege. Guet müglech, dass e früechere Bsitzer Salomon het gheisse, aber o dä het ke Tämpu boue, sondern es Burehuus.