No bis 1880 sy viu Schwyzer uf Amerika usgwanderet – Teu us purer Not, angeri ender us Abentüürluscht. So ab em Jahr 1870 sy de Usländer o i d Schwyz ygwanderet, wüus mitem Ufcho vor Industrie hie geng wie meh Arbeit het gha, aber nid gnue Lüt. Z Kanada hei o Ämmitauer zu de erschte Ywanderer ghört. Dr Herr von May us Niderhünige isch i britischem Militärdienscht gsy u het um 1820 ume probiert, Lüt z finge, wo i das nöie Land wei ga. Schliesslech het är de es paar gfunge. Drzue ghört het o dr Kunschtmaler Peter Rindisbacher vo Eggiwiu, wo 1821 schliesslich mit de angere Uswanderer a Red River i dr Nechi vom hüttige Winnipeg isch gange. Gha hets dert nüt weder Ygeboreni, auso Indianer.
Vo Südamerika hani weni Aagabe zu Uswanderige gfunge. Dr Gmeinsschryber Siegenthaler vo Schangnou isch 1857 mit sire Familie uf Argentinie usgwanderet. U e Familie Kauer vom Heimisbach hets 1888 i Süde vo Chile zoge. I ha nume use-gfunge, dass e Nicolas Gustavo Kauer eine vo de beschte chilenische Tennisspieler isch.
Uf Asie sy o öppe Ämmitauer, bsungerbar aus Missionare. Dert isch ja ds Chrischtetum nid grad verbreitet. I ha öppe Aagabe vo China oder Indie. E Eggiwiuer Stettler isch no vor em erschte Wäutchrieg uf d Philippine usgwanderet u het dert o e yheimeschi Frou ghürate u mit dere es Kuppeli Stettler gha. No hüt gäbs dert Nachkomme.
E chly hüfiger sy Aagabe über Soudate, wo im holländische Dienscht uf Niederländisch Indie (hüt Indonesie) sy cho. Dr Alois Wyrsch us Nidwaude isch zum Byspiu dr erscht Nationaurat gsy, wo nid wyss isch gsy, wüu si Mueter e Malayin isch gsy. Är isch vo de Nidwaudner aber 1860 glych i Nationaurat gwäut worde – da söu no öpper säge, die Innerschwyzer syge rückständig u konservativ.
Afrika drägge isch säute. I ha natürlech im Staatsarchiv e Poschte Toteschyne us der Frömdelegion gfunge, vo Ämmitauer Burebuebe, wo für «La Gloire de la Legion» sy gfaue, unger angerem e Beer vom Trueb am 5. Novämber 1849 z Algerie.
E Johann Gärber vo Schangnou, Suhn vomene Chüier, isch i d Basler Mission. U när isch är z Sierra Leone z Weschtafrika aus Missionar im Ysatz gsy.
So Missionare sy i dere Zyt i Länder cho, wo sech die meischte Ämmitauer nid emau hei chönne vorsteue, wo das chönnt sy. Es cha o e gfährlechi Sach sy, ds Läbe aus Missionar. Eine het mer mau si Stammboum zeigt, e Greyerzer. Si Ur-Ur-Grossunggle isch Jesuit u Missionar gsy u bim Todesdatum het er nume ytrage ghaa «env. 1888 assassiné et mangé par les cannibales à Nouvelles-Calédonnies» – är isch auso ufere Insugruppe, wo näbe Ouschtralie ligt, umbrunge u vo Kanibale gässe worde!