I bi chürzlech gfragt worde, öbs im Ämmitau Familie gäb, wo vo de Hugenotte tüege abstamme.
I ha bis hüt kener Ungerlage gfunge, wo das täte bewyse.
Aber villech isch nümme aune klar, was Hugenotte sy. Z Frankrych het sech d Reformation nach 1528 nid ganz düregsetzt, aber e grossi Minderheit isch reformiert worde. Me het d Reformation nach Calvin us Gänf aagnoo. Gänf isch unabhängig gsy, het aber mit de Eidgenosse verchehrt. Wäge däm hei d Franzose dene Lüt «Hugenot» gseit, was vo «Eidgenoss» chunnt.
D Obrigkeit het aues probiert, d Reformation z stoppe, aber das isch nid rächt glunge. Mir chöi drvo usgaa, dass 1560 öppe 10 bis 12 Prozänt vo de Franzose sy reformiert gsy. Es het e Bürgerchrieg gä u me het sech gägesytig d Chiuchene aazüntet. 1589 isch dr Henri de Navarra Chünig worde, wo reformiert isch gsy. Är het de aber gseit, är göng zrugg zum Katholizismus. Är het aber 1598 die reformierti Religion erloubt u die nächschte Jahr isch Friede gsy. Ersch 1685 ungerem Sunnechünig Louis XIV. isch die Bewilligung ufghobe worde. Drufabe sy öppe e Viertumillion Franzose i ds reformierte Usland gflüchtet, auso o i d Eidgenosseschaft. Me weiss, das rund 150´000 Hugenotte dür d Schwyz greiset sy. Gänf het denn uf 12´000 Ywohner nid weniger aus 28´000 Flüchtlinge zeut! Das muess me sech e Mau vorsteue!
O angeri reformierti Kantön hei ghuwfe wo müglech. Lausanne het d Stüüre für ds Reisegäut vo de Flüchtling usgä, Neueburg het rund 5300 Flüchtling sofort ybürgeret. Me weiss us de Ungerlage, das öppe 20´000 Hugenotte ir Schwyz sy blibe. Dr Grossteu isch wyter uf Preusse. Drum gits o hüt no viu Dütschi mit französische Näme. Hugenotte, wo ir Schwyz sy blibe, sy i de Stett ybürgeret worde. D Familie Ringier zum Byspiu z Zofige. Z Bärn, z Schaffhuse u z Winterthur hets no lang reformierti Gmeinde ggä, wo französisch isch gret worde. Fasch aui Hugenotte sy Handwächer gsy oder Bänker. D Uhreindustrie isch vo de Hugenotte gründet worde.
I bi gfragt worde, ob d Marending vo Dürreroth o Hugenotte syge. Dä Name isch säute, hüt gits nume no Marending vo Dürreroth. I däm Fau chani aber e hugenotteschi Abstammig usschliesse. Dr erscht Marending, e Ueli, het 1612 z Dürreroth e Vreni Flöscher ghürate u de mit dere acht Ching gha. Flöscher het z Dürreroth aber scho gä, da hets mehreri Burehöf gha, wo d Familie Flöscher het gheisse. Dr Ueli Marending muess vo usswärts sy cho. Bi kem einzige Ching isch e Marending Götti oder Gotte gsy. Drgäge isch dr Ueli Marending mehrmaus Götti gsy bi Ching us Dürreroth. Das isch nume müglich gsy, we eine rych isch gsy.