Im Archiv z Eggiwiu hani e Brief us Minnesota vo 1893 gfunge. E usgwanderete Eggiwiuer het Zouggs ufem Pfaffemoos gschribe. Dr Uswanderer isch e Mattias Stettler gsy u är schrybt sim Fründ Zougg.
Dr Grund isch gsy, dass är gerbt het u är het müesse mäude, wohäre me das Gäut söu schicke. Är schrybt, es syg am eifachschte, we me sis Gäut o am «Berglihans» tüeg schicke, de überchömm är das de scho. Dr Bärglihans syg z Amerika rych worde, är heig grad es nöi aagmauts Huus la boue u sogar d Schüür heig är la aamale. Das muess denn scho es Zeiche sy gsy, dass dr Bouherr rych isch.
Dr Bärglihans heig scho 18 Ross, öppe 20 Chüe u ganz hüfe Söi. Är heig ersch grad 80 Söi uf ei Brätsch verchouft.
Dr Stettler schrybt wyter, dass me hie ganz angersch tüeg bure. Choufe u Verchoufe göng viu schnäuer u settig Mängine kenn me daheime gar nid. Bim Höie nähm me nume grad ds Gröbschte, was grad gäbig uf d Gable göng. We me da würd das Land dünge, das gäbti so viu, das chönnti me gar nid aues bruuche.
Ds Land syg äben u tiefgründig. Steine wie im Eggiwiu heigs fasch kener. Wes aber amene Ort heig, löi me dert aus la lige u de verbuschi das dert. Wes nass syg, sygs de aber ganz «gschliferig». D Strasse syge de scho nid so wie ir Schwyz.
Dr Stettler schrybt o, dass da no viu Land wär u me das ganz angersch chönnt bewirtschafte. Für ds Strou überchöm me aber gar nüt, das löi me einfach la verfule. O für ds Brönnhouz heigs ke Absatz, är gsäih dert Brönnhouz verfule, wo me ganz Eggiwiu chönnt für viu Jahr heize. D Farmer zahle Gäut, we me ds Houz tüeg wägrume. Da häuf är aube o.
Är wöu luege, dass är mit sim Erbteu chönn e Farm choufe. Zrügg wöu är sicher nümme. Ds Land syg viu besser weder im Eggiwiu, dr Lohn syg höcher u es gäb au Tag Fleisch, Anke, Chääs u Miuch.
Itze chunnt är no uf ds Brot z brichte. Das syg de scho nid so guet wie das im Eggiwiu, das scho.
Nume so Wyssbrot gäbs, Chuscht heig das aber nid.
Zum Schluss verzeut är no, wie är u si Frou vo Eggiwiu uf Amerika syge: Am 17. Apriu am Morge früech syge si gfahre, am zwöi am Namittag z Basu aachoo. Am angere Morge sygs de uf Strassburg u de uf Luxemburg gange. Dert heig me übernachtet. Am Morge druf syg de d Reis wytergange mitem Zug uf Antwerpen. Dert syg me de am Abe ygschiffet worde. 1200 Lüt syge uf däm Schiff gsy! Die letschte Tage vo dr Seereis syg de ds Wätter schlächt worde, aber är heig nid viu gspürt u heig müesse lache über die, wo ds «Seefieber» heige übercho.
Är heig uf au Fäu nie müesse chotze – im Gägesatz zu sire Frou, die heigs schön verwütscht.