Zwüschedüre hani im Archiv z Eggiwiu o ganz auti Dokumänt gfunge. So isch inere Chischte us em Jahr 1640 e Gültbrief (hüt wär das e Schuldbrief) fürecho. Dert isch aus Züge o dr berüehmt Ueli Galli vom Gibu erwähnt. Dä isch im Burechrieg aus eine vo de ertschte Gägner vo de Gnädige Herre ufträte u isch de ghäicht worde.
Aut isch o e Brief vor Stadt Ludweiler im Hochfürschtliche Nassau-Saarbrücke, wo der Pfarrer vo 1740 am Amtskolleg vo Eggiwiu schribt, dass d Gschwischterti «Christian, Ulrich, Niklaus und Anna Magdalena Ricksecker itze Ungertane vom Fürscht vo Nassau syge u ufs Bürgerrächt vo Eggiwu tüege verzichte. Das Fürschtetum Nassau müesst me hüt im Bundesland Saarland sueche, aber o im Departement Moselle und Bas-Rhin. I ha usefunge, dass es o hüt i dere Gägend no Ricksecker oder Rixecker git! I dere Chischte isch no es ganzes Hüüfeli vo settige Briefe fürecho. Um 1700 sy Ämmitauer Bure i ds Rhiland zoge u hei dert sehr günschtig Land übercho. Nach mehrere Chriege hets dert viu Land aber nümme viu Lüt gha! Me schetzt, dass öppe zäh Prozänt vo de Ywohner dert irgendwie Schwizer Vorfahre hei. I ha säuber einisch es paar Fläsche Wy übercho vomene Herr Brand, wo es Wygut z Rhyland Pfauz het. Siner Vorfahre sy um 1670 aus Töifer «usgwanderet worde». O dr früecher DDR-Parteichef Erich Honegger isch vo schwizerischer Härkunft gsy, syner Vorfahre chöme us Rüti bi Züri. Dert hets gäng no viu Honegger.
Ir nächschte Chischte isch de meh nöiers Züg fürecho. Um 1910 isch im Steimöösli uf em Sieche probiert worde, im grosse Stieu Torf abzboue. Me het abghouzet u Fabrikations- u Lagerhüser bout u sogar e Kantine für d Mitarbeiter. Das ganze Abentür het i de 1920er Jahr im Debaku gändet, die Firma isch Konkurs gsy. Torf isch dennzumale no aus Brönnmateriau abbout worde. Mi het die Torfbitze trochnet u de (mit viu Ruess) verbrönnt. Torflandschafte sy hüt unger Schutz, so öppis macht me nüm. Guet – z Schottland gäb es no es paar Torfstächer, wiu me für e Whisky nume so ds bekannte Roucharoma härebringi.
Mord u Totschlag: O das Thema hani im Archiv im Eggiwiu gfunge. Ds Ziviustantsamt vo Wichtrach het im Apriu 1881 uf Eggiwiu gschribe, dass die Verchündig vom Brutpaar Zaugg-Furrer chönn us em Chäschtli gno wärde. Früecher het me ei Monet vor em Hochzyt das müesse im Chäschtli publiziere. De het jede, wo mit dere Hochzyt nid wär yverschtange gsy, Ysprach chönne mache. Dr Ziviler vo Wichtrach aber het gmäudet, dass dr Brütigam syg ermordet worde u d Brut syg bereits im Zuchthus glandet. E so chame e Verlobig o uflöse!