Im Gmeinsarchiv z Eggiwiu hani chürzlech es Dokumänt gfunge, wo i ufe erscht Blick gar nid ha chönne läse. Ufem zwöite Blick isch das Formular vom Jahr 1882 ganz offesichtlech uf Russisch gschribe worde u us Moskou cho. Innedrinn het e Notar us Moskou uf Dütsch bestätiget, dass d Handuschammere vo Russland nüt drgäge heig, we ds Fräulein Ola Ivanowa Stschukin wöu hürate, wüu o d Eutere vo ihre yverstange syge. Es steit o no, dass si kener Schulde heig. Leider hani nid usegfunge, wär das Frölein het wöue hürate, aber es muess e Eggiwiuer sy gsy!
Ds nächschte Formular isch de wieder eidütig vomene Eggiwiuer gsy: Es isch e Toteschyn vor Frömdelegion vom 23. Juli 1887 gsy. Denn isch dr Legionär Frédéric Krall vo Eggiwiu, Soudat vor zwöite Klasse im erschte Regimänt vor Frömdelegion im Militärspitau von Chu-Cang-Chuong a dr Foug vonere Verletzig anere Bluetvergiftig gstorbe. Das wär im hütige Süde vo Vietnam. D Franzose hei i dene Jahre ds hütige Vietnam, aber o Kambodscha u Laos eroberet u die Länder sy französischi Kolonie worde. Drby het d Frömdelegion ghuwfe, das Land für Frankrych z erobere.
Ds nächschte Formular isch wieder erfröilicher, chani doch säge, dass dr Chünig Umberto I vo Italie isch yverstange, dass dr Giacomo Ruegsegger vo Eggiwiu d Bonania Domenico dörf hürate. Die beide hei in Varallo gwohnt, auso im hütige Piemont. Das Formular het zwe Lire koschtet u das aus isch o im 1882 passiert.
E ganze Wüsch vo Dokumänt sy usem Jahr 1880 gsy. Dr Dokter Steller het uf dene Protokou d Todesursach vo de gstorbene Eggiwiuer bestätiget. So isch nach dr einte Beschynigung dr Simon Röthlisberger uf Nöie-
schwang aus Ching im Brunnetrog ertrouche.
D Strafaastaut im Thorbärg het 1887 dr Gmein Eggiwiu gschribe, dass die 16-jähregi Adele Dubach vo Eggiwiu ir nächschte Zyt entlasse wärdi. Si heig sech guet bewährt u me syg zfriede mit ihre. Aber si heig gar kener Chleider u me chönn se nid ir Sträflingsuniform la gaa. Drum söu d Gmein Eggiwiu drfür sorge, dass si chönn «ziviu» ykleidet wärde.
Vo 1840 isch de no e Rächnig fürcho vom Schryner u Sager Peter Schänk. Är het nämlech für die beide Jahr 1839 u 1840 e Rächnig gmacht für sächs Särg, wo är gschryneret het, aber nid sy zaut worde, wüu ke Gäut isch ume gsy: Es isch um zwe Chindersärg gange u vier für erwachseni Persone. Eine vo denen Särg isch für d Frou vom «Hohleflühler». Dr Schryner schrybt, dass är dr Name nümme wüss, aber aui säge däm «Hohleflüeler». Im Ganze het är 105 Batze vor Gmein wöue. Dr Aumosner het ihm de das Gäut am 17. März 1778 de o zaut.