E Dublone vo 1794. / Bild: zvg
Zwo Sache hani grad letscht Wuche im Archiv im Eggiwiu gfunge.
Afe einisch die erschti Wirtschaftskonzession vom Gasthof im Hiipu für e Gottfried Röthlisbärger vom 23. 9. 1878 u de no e Vertrag vo 1785 – dä isch bsungerbar Bsungerig! Es isch nämlech e Arbeitsvertrag für ne Lieferig vonere Chiucheorgele. D Eggiwiuer hei dennzumale bim Orgelemacher Peter Schärer vo Sumiswaud e Orgele mit zäh Regischter bsteut. Für die Arbeit het är es Jahr Zyt gha u är het die Orgele zumene pouschale Prys vo 310 Gramm Fynguwd müsse liefere. D Bänkeler unger öich wüsse: das sy zäh Unze Fynguwd. Gnaugno isch im Vertrag vo 50 Dublone d Red, aber d Unze sy dennzumale dr Standard für Guwdmünze gsy u wäge däm bruche mir drum die Unze gäng no!
Inere angere Schachtle sy Bestätigunge fürecho für ds Uflöse vo Vormundschafte vo Eggiwiuer, wo niemmer me het gwüsst, wo die ächt sy! We früecher öpper i ds Ussland isch gange, het me ihm si Erbteil uf dr Gmein deponiert u verzinset. We eine aber nach 35 Jahr gäng no nüt vo sech het la ghöre, hei die angere Erbe chönne am Landvogt es Gsuech steue, är söu das Gäut uszahle. So nes Gsuech hei im Jahr 1737 dr Hans Haldemann ir Aeschou (bevormundet düre Hans Galli us em Aeschou), si Schweschter Mädi Kiener-Haldemann u d Anna Joder-Haldemann am Landvogt gschickt. Si hei gschribe, dass ihre eutischt Brueder scho meh aus 35 Jahr im Usland syg. Är syg sinerzyt zu dr «täuffersche Secte» gange u me heig nie me öppis ghört vo ihm. 30 Bärnchrone syge uf dr Gmein deponiert füre Brueder. Das wäre öppe 5000 Franke i hütiger Währig.
Churz nachhäre chöme i dere Chischte no Postcharte füre. Die sy aui us de Jahr 1876 bis 1885
u vor Cigarrefabrik Hammerschlag us Breme. Dr damalig Gmeinsschryber Gränicher isch vermuetlech e starche Roucher gsy. Jedefauss isch nach dene Postcharte gänge es Päckli mit 300 Cigarre z Breme abgschickt worde uf Eggiwiu. Ganz eidütig sy aber die Cigarre us der Gmeinskasse zaut worde! Dr Gmeinsschryber het offesichtlich sis «Rouchhobby» vor Gmein la finanziere. Är wird aber sicher sine Bsuecher o so ne «Gemeins-Cigarre» aabotte ha!