Gäng ume chunnt öppis füre, weme i de Archiv tuet sueche.
Im Archiv vo Eggiwiu hets hüüfe Schachtle, wo nume «Historische Akten» druffe steit.
Mängisch isch es e churze Chutt. Vor es paar Tag sy üs zwo Chischte mit Hochzytsakte vom Ziviustandsamt begägnet – die nütze üs für ds Heimatbuech nid viu. De hets ume Rächnige u Quittige, wo scho lang über 150 Jahr sy bündlet gsy, u wo mir itze wieder uftüe. Ob dr Haudimaa 30 Franke oder 20 Franke het zaut, isch is eigentlich glych, aber die schöne Formular vo de Eggiwiler Firme u Handwärker, Wirte u Chrämer ghöre äbe scho i ds Buech. Mängisch müesse mir de no usefinge, wo die Ungernäme sy gsy. Oder wüsst dir, wo dr «Paul Kühni» im 1930 si Schuelade het gha? Oder was dr Chrämer Ueli Haldemann ir Schwelli für Ware het verchouft?
Oder da heimer e Rächnig für ds Schueuexame vom Apriu 1857. Dr Wirt Johann Wüthrich im Aeschau het nämlech für das Exame uftischet. 14 Pfung Fleisch het är für 40 Rappe ds Pfung verrächnet, drzue chöme no vier Pfung Späck u 7 Mäss Wysswy. Vo Brot steit nüt! Aber wärum scho Brot ässe, wes Fleisch git?
Die nächschti Rächnig isch vom Schryner Haudimaa im Krummbach. Für ds Schueuhuus z Horbe het är euf Fäischterflügeli gmacht u drfür euf Franke verrächtet. Für ds Schueuhuus im Hiipu het är de Fäischter nöi müesse glase. Was hei die Schüeler äch gmacht? Es isch im Jänner 1858 gsy, wo är das het gmacht. Die cheibe Schüler hei sicher gschneebäuelet. Mir hei das öppe o gmacht u einisch o e Fäischterschibe im Schueuhuus ygschlage.
Zwüsche dene Quittige sy aber gäng o wieder Briefe, Reklame u amtlechi Schrybe drinn. We e Eggiwiuer irgendwo nümm het chönne zahle oder är vonere Kuppele Ching isch ewäg gstorbe, het d Gmein müesse luege. Vilech het sogar e Gmeinrat uf Länzburg oder uf Yverdon müesse, wäge dämm. I dr einte Chischte sy Gwehrschyne füre cho. Dir wüsst nid, was das sy? We me früecher het wöue hürate, het me em Pfarrer müesse bewyse, das me e Pischtole oder es Gwehr het. Süsch isch das nüt worde. Dr Christian Neukomm vo Eggiwiu het jedefaus vom Trüllmeischter Siegenthaler vom Schangnou am 4. März 1862 die Beschynigung übercho. Er het auso chönne hürate!
Vom Jahr 1857 isch no e Quittig vom Gmeinrat fürecho, wo die Herre ihrer Jahresghäuter hei quittiert. Eggiwiu het zwe Gmeinspresidänte gha: Dä, wo eifach d Gmeinsversammlig het gleitet, het föif Franke übercho. Dr anger Gmeinratspresidänt het 30 Franke übercho. Die acht Mitglieder vom Gmeinrat hei jede 20 Franke Jahreslohn übercho. 20 Franke, we me das umrächtet wäre das öppe hüt 250 Franke.