Error compiling Razor Template (contact the administrator for more details)

Es auts Handwärch u uffäuegi Vögu

Es auts Handwärch u uffäuegi Vögu
Der Alischbach het aube e Rindestampfi aatribe. / Bild: Bruno Zürcher (zue)

Im Schangnou hinger gits e «Rindenmatt» u vo Trachsuwaud gits Belege, wo zeige, dass me früecher aube Räf mit Boumrinde belade u die abtransportiert het. Für was het me die brucht? Unger angerem für ds Gärbe. Us dere Rinde, am beschte geits offebar mit Eiche- u Tannerinde het me ds Gärbmittu härgsteut – die sogenannti Lohe.  Die Matte im Schangnou, wo aube das Rindestampfeli isch betribe worde, isch ganz ir Neechi vor Gärbi, das macht Sinn. 

Wüu die Stampfeli hüüfig nid fescht amene Ort sy gsy, fingt me o weni settegi Notize i aute Dokumänt. I de Ratsmanual usem 15. Jahrhundert fingt aber quasi es Bougsuech für ne Rindestampif im Gebiet Alischbach, ir Gmein Louperschwiu: «hans locher begärt, ein rindenstampffi zu buwen». Es Bougsuech im hütige Sinn isch das natürlech nid. Die Sach isch im Rat verhandlet worde, wüu dä Hans Locher zersch offebar e Müli het wöue boue u när ersch d Idee vonere Stampfi het gha. Dr Rat het när d Abgabe aapasst: «sol hinfür 1 ß zins darvon geben.» «1 ß» meint ei Schilling, das isch dr zwänzgischt Teu vomene Pfung gsy. 

Dass de aber würklech e Rindestampfi isch betribe worde, zeigt o dr Ytrag im Trachsuwauder Urbar vo 1569: «Im alisbach Rinden stampfe». 

Ganz ähnlech wie «Rinden» tönt natürlech «Rinder». Guschti  oder äbe Rinder gits ja im Ämmitau u Äntlibuech ganz viu u natürlech o Stäu, wo die z Schärme oder a Schatte chöi. Offebar sy aber o es paar Näme zu «Rinderstau» umdütet worde, wos gar nie e Stau het gä. Es het nämlech früecher ds Wort «Rinderstrale» gä, wo nüt angers aus d Voguart «Star» het gmeint. Imene Urbar vo 1531 isch e Acher im Bigetu (Bigenthal) mit «Der rinderstralscher, III Juch» notiert worde.
U imene angere Dokumänt usem Jahr 1530 isch i däm Gebiet «amm Rinderstralÿ» notiert worde. 

Die Vögu sy natürlech scho de Bewohner i dere Zyt ufgfaue, vor auem wüu si ja i grosse Schwärm ungerwägs sy.
D Ortsnäme mit «Rinderstrale» wyse uf Gebiet häre, wo die Vögu aube z Nacht z sädu sy. 

04.08.2022 :: Bruno Zürcher (zue)