Gäng ume gits Frage zu Familienäme. Wärmuet (Wermuth) isch zimli säute. Das isch e Name, wos nume z Signou u z Eggiwiu git. Eggiwu isch ja e «nöii» Gmein u isch vorhär Teil vo Signou gsy. Rächt schnäu gseht me aber, dass die Familie nid zu dene mit Grundbsitz hei ghört. Ir Signouer Linie fingt me de aber scho früech Schueumeischter, Händler (Chrämer) u Sigrischte.Schrybe hei si auso scho gäng chönne!
Im Eggiwiu gits us em Jahr 1743 no es Wohnsitzregischter. Dr Pfarrer het denn aui Hüser ufgno u ygschribe, wär dert wohnt. Im Heipu sy Wärmuet gwohnt (armi Lüt, Taglöhner, het dr Pfarrer kommentiert), e angeri Familie isch ir Höu gwohnt (das isch grad uf der angere Syte vo Heipu). Der eint Suhn isch aber denn z Holland gsy aus Frömdelegionär. O bi dere Familie het dr Pfarrer nume «Arm, ja sehr arm» gschribe. Die meischte Wärmuete hei denn scho usserhaub vom Eggiwiu gwohnt.
Der bekanntischt Eggiwiuer Wärmuet isch äue dr Politiker Cederic Wermuth, dr hütig Co-Chef vor SP.
Bi de Signouer Wärmuet hets meh rycheri Lüt gha. Die Familie isch aus Sauzhändler bekannt gsy, hei d Schueumeischter vo Signou gsteut u sy o gäng wieder Sigrischte gsy. Über Generatione het ne ds Egghuus z Signou ghört. Das isch das, wo dert isch, wo aube d Beckerei Wäuti isch gsy. Egghuus drumm, wüu me früecher nume über d Bärge vo Signou uf Eggiwiu isch cho. Im Tau unger hets ke Strass gä. Us dere Familie vom Egghuus hets de o Wirte, Metzger u Notare gä. E Tochter vo dere Wirte-Familie isch ghürate gsy mitem Alexander Kocher, amene Zimmermaa us Büre ar Aare. Ihre Suhn isch dr Nobäuprysträger Profässer Emil Theodor Kocher gsy!
D Härkunft vom Name Wärmuet isch nid klar. Es heisst öppe, dass das öpper isch gsy, wo Chrütterkundler syg gsy. Aber es heisst o i eim Handbuech, dass es öppis chönnt mit «Warmund» z tüe ha, amene aute Vorname.
We me i de Toufregischter list, merkt me, dass d Pfärrer dä Name geng öppe angersch hei gschribe. Sogar bi Eutere mit viune Ching, fingt me ungerschidlechi Näme: Vo Mermet über Wermett zu Marmet.
Im Schlossurbar vom Jahr 1635 isch gäng Marmet gschribe worde. Dr Niklous Marmet isch Chrämer gsy u het z Schüpbach gwohnt. Im Urbar vo 1685 steit uf einisch Marmatt. Weme d Toufregischter aaluegt, heisst dä glych Händler aber Wermutt oder Wärmuth.
I ha drum hüt dr Ydruck, dass dr Name eigentlech Marmet sött heisse. Die chöme viu im Oberland vor u sy vermuetlich aus Wäutschchäser o i ds Ämmitau cho. Gredt hei die haut «Oberländisch» u dr Pfarrer wird das schlächt verstange u drum fautsch gschribe ha!