Uf Äugstere, Gmein Rüegsou, isch äue aube e Schafstau gstange.
«Clauus im Oustal in der parrochie zu Ruegsouwe» steit imene Dokumänt usem Jahr 1389. Es isch guet müglech, dass das die euteschti, erhauteni Erwähnig vom hütige Ort «Äugstere» isch.
Dass d Schrybwys vo dere sehr aute Bezeichnig geng ume chly gänderet het, zeigt sech o da dranne, dass hüt uf dr Charte nid nume «Äugstere» steit, sondern o «Eugstere».
Im «Urbar und Heuschrodel über die Bodenzinse und Gefälle des Frauenklosters Rüegsau» usem Jahr 1495 isch dä Ort äbefaus z finge: «von uogsteren». Me gseht auso, dass dr «g» ersch im Louf vor Zyt i die Ortsbezeichnig grütscht isch.
Ursprung vo däm Ortsname dörfti ds authochdütsche «ouwist» sy, wo sinersyts vom gotische «awistr» abstammt. Die Wörter hei ganz eifach e Schafstau bezeichnet. Amene Mueterschaf seit me ja no hüt «Oue» u das isch im Authochdütsche ganz ähnlech gsy: «ou(wi).
Im Gebiet vor «Wuche-Zytig» gits no meh Ortsnäme, wo e Zämehang mit däm Wort hei. Äbefaus autbeleit isch «Äugste» ir Gmein Linde. A däm stotzige Bord steit übrigens no hüt e chlyne Stau. Das isch sicher nümme dä, wo um ds Jahr 1500 i de imene Rodu aus «Aneüsten» isch erwähnt worde. 1547 isch de imene angere Dokumänt «an Oeusten» ufgschribe worde u 1592 «in Oeügsten» – o hie gseht me, dass dr «g» ersch mit dr Zyt i die Bezeichnig isch cho.
1735 isch wyter o ir Gmein Langnau e settige Ort erwähnt worde, wo genau glych «Oeügsten» het gheisse. Intressanterwys isch hie aber nid «Äugstern» ar Strass vo Gmünde gäge d Lü-
dere gmeint, sondern ds hütige Heimet «Aeugstmatt» im Oberfrittebach.
Wie gseit, heit die Ortsnäme zimli sicher aui e Zämehang mit «Schafstau», was bi fasch aune o vor Laag här Sinn macht. Me cha aber nid ganz usschliesse, dass einzelni vo «August» abstamme. D Bezeichnige mit däm Monetsname chöme meischtens vo dahär, dass denn dert d Ärnt ryf isch gsy. Drmit isch nid nume Getreide gmeint, sondern o Heumatte wo denn sy gärntet worde.
Wyter chunnt bi dene Ortsnäme o dr Personename «Augustus» i Fraag, wo i aber bi de Byspiu vo hieumenang niene gseh ha.