Im Gmeinsarchiv vo Eggiwiu hets a ganze Bärg vo Schachtle, woni mit em Murer Chlous düregaa, ir Hoffnig öppis für ds Eggiwiu-Buech z finge. Im erschte Dossier steit öppis überne Schueuhuusbou, im nächschte über ne Reklamation, dass dr Becker sis Brot 30 Gramm z liecht machi u im nächschte Couvert finge mir e Brief vomene Eggiwiuer, wo im Jura hinger es Hotäu het bschisse.
Aber da isch mir no e Brief vo 1879 uf ds Pult cho, wo e Herr Wildbolz uf Eggiwiu schrybt. Är syg Vormund vomene Jakob Burgdorfer. Dä Name gits im Eggiwiu aus Burger no hüt. Äbe, dä Jakob Burgdorfer syg sis Mündu u dä machi im Momänt grad e Lehr aus Schumacher im waadtländische Oron. Im Früehlig wärd är de fertig u de wöu är aus Gseu uf d Wanderschaft für drü Jahr.
So Wandschafte gits ja hüt o no. Zimmermanne hani einisch sogar drei ufglade, woni gäge Bärn bi gfahre. Die Handwärker trage ja hüt no bsungeri Trachte, dass me gseht, dass si uf dr Wauts sy.
Dr Vormund vo däm Jakob het aber uf Eggiwiu gschribe, wüu e Herr Neuhaus bi ihm syg uf ds Büro cho u heig aus Müglechs über dä Jakob Burgdorfer wöue wüsse. Är heigi gfragt nachem Geburtsdatum, nachem Name vor Mueter u ob är würklech unehelig syg.
Dr Wildbolz het de ds Gfüeu gha, dass das e chly komisch syg u het ihm gseit, är söu de inere Wuche ume cho. Dr Vormund het nume usegfunge, dass dä Neuhaus e ryche Maa syg, Dachdeckermeischter u Bsitzer vo mehrere Hüser z Bärn.
Wo dä Maa e Wuche später wieder bim Wiudbouz isch gsy, isch de uscho, dass dä Neuhaus d Mueter vo däm Jakob kenni, sehr guet sogar. Är syg vermuetlech däm si Vater.
Är verzeut, dass är churz vor der Geburt vo däm Ching dr Mueter heig Adie gseit, ihre öppis Gäut het gää u de für föif Jahr ids Usland syg. Wo är zrügg chömm, heig är weder d Mueter no ds Ching gfunge. So heig är die Sach vergässe u e Firma gründet, Erfoug ghaa u o e angeri Frou ghüratet. Mit dere heig är o e Bueb, aber dä syg bimene Umfau umcho. Drum heig är itze wieder a die auti Sach däicht. Itz wöu är luege, öb ihm dä jung Burscht gfaui. Wenn ja, de wöu är ne aus Suhn aanäh. Sinere Frou heig är aber nüt gseit!
Imene spetere Brief steit, dass dä Jakob Burgdorfer grad sofort mit sim «Vater» uf Bärn syg. Sire Frou heig är gseit, dass das sis Göttiching syg. Dr Bueb het du aber verlangt, dass die Vaterschaft i de Büecher z Eggiwiu ygschribe wird. Wäge däm het sech nächär dr Vormund bim Gmeinrat Eggiwiu gmäudet. Söue die das im Gmeinrat einisch aaluege!
I versuche de no usezfinge, ob dä Handu grate isch.