Dr Grabe vo de Stuckers, ir Neechi vo Bowiu. / Bild: Bruno Zürcher (zue)
Weme hüt im Telefonverzeichnis luegt, de gits z Bowiu kener Stucker oder Stuker meh. Es het aber aube gää, das isch sicher. Afe einisch gits no hüt Lüt, wo so heisse u Heimatort Bowiu hei. U de gits no dr «Stuckersgrabe». Über dä Bach fahrt me, weme vo Bowiu-Dorf Richtig Gouchere ungerwägs isch. Das Gebiet, wo so heisst, isch zwüsche de Heimet Schwändimatt–Egg–Breitägerte. Lutt de historische Belege isch es guet müglech, dass eis vo de Heimet im Gebiet Egg aube eso het gheisse. U bevor das Gebiet de Stucker het ghört, het das «Schräpfergrabe» gheisse.
Wohär chunnt dr Familiename Stucker? Da gits verschiedeni Müglechkeite. Viu Sprachforscher säge, dass dä Name vomene aute Wort abstammt, wo o aus Ortsbezeichnig ist bruucht worde: «stucki». Us däm isch im Louf vo de Jahrhunderte ds schwyzerdütsche «Stuck» oder o «Stück» worde. Gmeint isch eifach e Teil vomene Ganze. I Flurnäme sy bestimmti Parzäue gmeint oder es ender entlägnigs Grundstück – «dert hei mir o no es Stück». Wes nume e ganz chlyne Bitz Land isch, redt me vo «Stucki» oder «Stücki». Intressant isch no, dass mir ja hüt «ds Stück» säge, wie im Hochdütsche. Ursprünglech isch das aber männlech gsy. Me het aus «dr Stuck» gseit.
«Stücki» heisse zum Byspiu bestimmti Stück Land bi de Heimet Schnerlen u Xanderheim bi Äschlismatt. Imene Dokumänt vo 1702 steit «dass stückhÿ im Mitleren schnerlern». Sogar scho imene Urbar vo 1535 isch
«Wyden stûckj» ir hütige Gmein Grosshöchstette erwähnt. Dert isch es auso um e Bitz Land gange, wos offebar viu Wyde het gha. Z Niederhünige hets uf dr Zälg es «stugli» gä. Das isch «jm winckell» gläge u «ij» (zwo) Jucherte gross gsy.
1½ Jucherte isch ds «Thorstuck» z Chonufinge gsy.
O dr Familienamen Stucki isch scho aut. Im Trueber Urbar isch dr Chnubu vom Stucki – auso «Stuckiß knubell» – notiert. U z Ursälle het lut em Jahrzytbuech vo Worb usem Jahr 1492 es Grundstück a «hansis Stukis len» gränzt. Dr Familiename Stucki isch im ehemalige Amt Chonufinge rächt hüfig, drnäbe isch är o ir Gmein Röthebach autbeleit.