D Lehrere vom Niederbärg z Eggiwiu isch 1912 d Hilde Furer worde. Wo die jungi Lehrere isch gwäut worde, het si zersch uf dr Charte müesse luege, wo das Eggiwiu genau isch. Si hets de ömu gfunge. Die Hilde Furer isch e bsungeri Frou gsy. Si het nüt uf em Mannevouch gha, ussert, dass si o gärn het Zigarre u Pfiffe groucht u o gjasset u gwettet het.
I irne Läbeserinnerige hani aber eis Gschichtli usegläse, wo mi bsungerbar het interessiert. Si isch nämlech 1914 mit de Schüeler vom Niederbärg uf Bärn a d Landesusstellig.
Das isch scho rächt schwierig gsy, dennzumale. Pro Schüeler het si 3.50 Franke müesse uftrybe. Für die Ching isch das e überwäutigendi Sach gsy: 18 vo dene Eggiwiuer Ching syge vorhär no nie uf Signou choo u hei o nid gwüsst, wie ne Ysebahn usgseht.
Dr Sämu vor Schueukommission het dr Leiterwage gnoo, d Ross aagspannet u isch mit dr Lehrere, de Ching u no zwo Froue vom Niederbärg Richtig Signou gfahre. Unger im Dorf hei si längi Stange gseh, wo obe e Art Schnuer gspannet isch gsy. D Lehrere het ne erklärt, dass das äbe e Telefonleitig syg. Eine vo de Nünteler heig sech wöue wichtig mache u verzeut, dass me mit somene Telefon sogar bis uf Mailand chönn telefoniere. Eis Ching het das nid ganz verstange u ganz erchlüpft gfragt, ob me drmit würklech chönn mit em Heiland telefoniere, steit i de Ufzeichnige vor Lehrere. Z Schüpbach hei si ds länge Chemi vor Ziegelei gseh u me isch rätig worde, dass die da e ganz komische Chiuchturm heige.
Z Signou isch de ds Warte ufe Zug e Sach worde. Si hei wöue wüsse vor Lehrere, öb si de ächt o gmäudet heig, dass d Ysebahn stiu heig! Wo de dr Dampfzug isch vor Ämmematt här azschnuufe cho, sy aui Ching drvor gsecklet u hei sech hingerem Bahnhof versteckt. Da druf chäme si nid, heige si gseit. D Lehrere u ihrer Häufer hei die gröschti Müej gha, das verchlüpfte Kuppeli Ching z beruehige. Dank dr Hiuf vom Stationsvorstang het si am Schluss aui im Wagon gha – dr Vorstang mit sire rote Mütze het de doch Ydruck gmacht.
Wo de dr Zug isch losgfahre, sy aui mucksmüseli stiu im Wagon ghocket u hei sech nid trouet, öppis z säge. D Lehrere het de wöue d Fäischter aachelaa, de chönn me besser useluege. «Tue nid uf, tue nid uf», heige d Ching aber gseit u sy zämegrütscht u hei sech a de Häng gha. So sy die Niederbärgler uf Bärn gfahre. Kes syg einisch ufgstange, brichtet d Lehrere. Churz vor Gümlige het si gfragt, ob ne die Reis gfau. Da heisi doch de gnickt. E chlynere Bueb heig de schüüch gfragt: «Flüge d Hüser u Böim wäge dr Ysebahn eso furt?».