Error compiling Razor Template (contact the administrator for more details)

Es Handwärch u e hüfige Familiename

Es Handwärch u e hüfige Familiename
Dr Schmittehof im Längegrund isch scho öppe 1481 erwähnt. / Bild: Bruno Zürcher (zue)

Schmitte sy früecher die einzige Wärchstätte gsy, wo mit Metau isch gschaffet worde. Klar, dass die wichtig sy gsy. Das zeigt sech o da dranne, dass us dr Bruefsbezeichnig Schmid eine vo de hüfigschte Familienäme isch worde. Es git verschiedeni Schribwyse: Schmid, Schmied, Schmidt u Schmitz. Gmeint isch eigentlich immer ds Glyche – d Schryberlinge uf de Ämter u d Pfärrer hei eifach e chly unterschiedlech gschribe. D Ahne vo dene Lüt sy Schmide gsy oder hei ire Schmitte gwohnt. Vor auem im Äntlibuech gits de no dr Familiename Schmidiger. Die hei entweder o e Zämehang mit em Handwärch Schmid oder stamme ursprünglech vo Schmidige, wo nördlech vo Affoutere z finge isch. Schmidige het äue ke Zämehang mit däm Bruef, ender mit eme mittuauterleche Personename wie «Smido».

Wüus viu Lüt git, wo Schmid heisse, gits natürlech o viu Ortsbezeichnige wo uf dä Familiename zrügggö: «stost unden an Schmids acher» isch d Beschribig imene Urbar vomene Acher z Lützuflüeh. Es git im Gebiet vor «Wuche-Zytig» no wyteri Ächer, wo eso heisse. Scho i Dokumänt usem 14. Jahrhundert sy d Heimet Schmiedbärg bi Rüeg-
sou erwähnt. I de Tellbüecher vo 1389 isch d Red vomene «Buri von Schmidberg». Scho alleini vor Laag här, cha dä Ort aus «dr Bärg vor Familie Schmid» dütet wärde. 

Äbefaus aut beleit isch o dr Schmittehof im Längegrund ir Gmein Trueb. I dr Rächtssammlig vo dr Landschaft Ämmitau usem Jahr 1481 isch e «Heini zue der Schmitten» notiert worde. Im Trueber Urbar vo 1531 isch de e «Chuonrat zur Schmitten» bim «Guot zur Schmitten» ufgfüehrt. Itz steut sech natürlech d Frag, öbs dert e Schmitte het gha oder nid. Das chame nid ganz klar säge. Ich däiche, dass das Heimet eifach am Bsitzer vor Schmitte het ghört. 

Äbefaus imene aute Dokumänt isch mir no d «Schmittenn Fluo» bi Lützuflüeh. Die Flueh isch äue ir Neechi vom Rain, wo genau weiss i aber nid. Villech cha mir ja öpper wyterhäufe. Es chönnt sy, dass die Flueh, wäg dr Schmitte, wos unger dranne het gha, eso isch benamset worde. Es git no ds einte u angere zu de Schmitte-Ortsnäme z säge. Ds Yse isch no heis, im nächschte Ört u Näme schmide mer de wyter.

28.04.2022 :: Bruno Zürcher (zue)