We Ching alleini sy dagstange

Me redt ja scho sit amene Zytli vo dene Verdingching. Es sy ja meischtens Ching gsy us grosse, aber arme Familie, wo nie wäre ir Laag gsy, aui dürezfuere. So Familie vo Taglöhner mit zäh oder no meh Ching fingeni geng ume i de Bürgerverzeichnis u i de Ungerlage vo de Vormundsschaftsbehörde. Drzue chöme o no unehelichi Ching. Die het me de Müetere meischtens furtgnoo u wyt vor Mueter dänne verdingt. 

Im aute Bärn het d Mueter das uneheliche Ching nach sächs Monet am Vater müesse abgää u dä het dr Mueter sogar müesse e Ammelohn zahle. We d Mueter nid am Heimatort het gwohnt, isch das Chingli i viune Fäu irgendwo ir Bürgergmein a meh oder weniger geeigneti Lüt verteilt worde. I ha im Schangnou e Fau gfunge, wo sogar dr Pfarrer es Chingli het übernoo. 

Bsungersch tragisch sy aber die Fäu, wo d Ching sy Vouweise worde. I ha zwe Fäu us de 1930er-Jahr gfunge. Die sy ganz ungerschiedlech glöst worde, was i wäge däm im Schangnou- Buech wirde vorsteue. 

Bim erschte Fau sy dr Buur u si Frou churz ufenenang gstorbe. Siebe Ching sy Vouweise worde, si sy no z chly gsy, dass eis hät chönne bure. Hie sy d Ching nid vonang grisse worde, eini vo de Grossmüetere het se ufgnoo u für se gluegt. O dr Hof isch so erhaute blibe, wo dr eint Suhn isch aut gnue gsy, het är ds Heimet überno. Hie hani o no es Foto vom Grossmüeti mit sine siebe Grossching.  

Im zwöite Fau isch dr Vater verunglückt, wo d Mueter isch schwanger gsy. Si het scho euf Ching gebore, drvo sy aber drü aus Bebeli gstorbe. Wo de das Chingli Nr. 12 isch uf d Wäut cho, isch das e schwäri Geburt gsy u d Mueter isch vier Tag speter gstorbe – so sy nün Ching alleini dagschtange. 

Die eutischti Tochter isch grad fertig gsy mit der Schueu u het aus Magd chönne wärche, die angere Ching sy verteilt worde, meischtens ganz ir Neechi. Dr chlyn «Liebeli» (Gottlieb), das Bebe wo überläbt het, isch zunere Tante cho. I ha vo de Nachkomme sogar e Lischte übercho, wo die Ching überau sy verteilt worde. Wüu fasch aui im Buembach sy blibe, hei si sech äue ir Schueu gseh. Vo «Liebelin» hani de im Ziviustandsamt vernoh, das är mit 28 Jahr aus Pflegling ir Aastaut Bärau gstorbe syg. Die schwäri Gebuert, wo dr Mueter het ds Läbe koschtet, ist vermuetlech o bim Liebeli es Problem gsy. 

Me ghört ja geng ume schlimmi Sache, wo Verdingching hei müesse dürestah. I ha zum Glück o e ganzi Reihe vo so Gschichte gläse, wos guet isch usecho.
I kenne sogar so Fäu, wo das Verdingching schliesslech sogar der Hof vo de Verdingeutere het chönne übernää. Für aui Verdingching-Gschichte, egau ob guet oder schlächt, hani gäng es offnigs Ohr.

10.03.2022 :: Hans Minder