Vom Jahr 1833 het der Pfarrer Brugger vom Schangnou über ds Wätter nüt z schrybe gha, es syg nüt Bsungers gsy.
Aber Mitti Juli heigs e Mondfinschternis gä u gly drufache no e teilwysi Sunnefinschternis.
Wyter schrybt dr Pfarrer i sire Chronik, dass es nöis Chiuchegsangsbuech syg usecho u är heig afe einisch es Muschter bschteut. Umschteue uf das nöie Buech im Schangnou, schrybt dr Pfarrer Brugger, das syg «für die hiesige Clientschaft» öppe nüt.
Nid nume es nöis Gsangsbuech isch usecho, z Bärn isch o e nöii Regierig am Rueder gsy: Die het gäng e so sonderbari Rundschrybe gschickt – aber mit dr Vouksregierig het dr Pfarrer Brugger no gäng nüt chönne aafaa. Drfür het är de meh Rüggedeckig gäge d Schangnouer Regierig, wes um ds Schueuwäse geit. Die nöii demokratischi Füerig z Bärn weiss, dass es nume cha klappe mit der Vouksherrschaft, we die chönne läse u schrybe!
I däm Jahr syge d Schangnouer anere Lischesteigerig z Mürre gsy. Lische isch grobs Gras, wo im Herbscht no steit u när gmäit u deeret u de im Winter am Veh gströit wird. Dr Pfarrer Brugger, wo o a die Steigerig isch, het offebar ufere Charte müesse luege, wo dass dä Ort liegt.
Item, es het dert äuä ziemlich gräblet a dere Steigerig! Dr Pfarrer schrybt, dass die Oberländer «Brönzz» heige verchouft u schlussändlech «eine schamlose Ausgelassenheit der jungen Leute» heig usegluegt. Dr Pfarrer het drzue no grad müesse es Schrybe us Bärn verdoue. Verlangt doch die nöii Regierig o no, dass me dr Hebammedienscht tüeg verbessere. So öppis Nutzloses! Dr Pfarrer schribt i sis Büechli, dass die Regierung doch ke Verstang heig!
Ufe 1. Jäner 1833 het o dr Lehrer Hirschi si Dienscht aaträtte. Dä Lehrer syg sehr guet, meint dr Pfarrer. Es syg es Vergnüege o für ihn, däm bim Ungerricht zuezlose. D Schangnouer Ching heigene gärn u si syge viu fründlicher worde, wemene begägni. Dr Pfarrer schrybt «wenn auch der Saame bald errinnt und nichts Schreckliches über die keimende Saat kommt!». Är het äuä no a die donnersch Oberländer däicht mit irem Bäziwasser!
Dr Pfarrer het mit em Zins vomene Legat es paar Büecher, Chinderbible u Läsebüecher chönne choufe u a d Schüeler verteile. Drzue heig ihm d Gmein sogar 20 helvetischi Franke gä, dass es no e chly für meh Büecher het glängt. Si hei de gwünscht, dass me am Exame de flyssige Schüler e Prys gäb. I ha ömu im Gmeinsarchiv no us de 1850er- u 1860er-Jahre so Examelischte gfunge, wo isch ygschribe worde, weli Schüeler em beschte syge gsy u es Buech heige übercho!