Ufem Tanzplatz z Oberhünige chame hüt gmüetlech brätle. / Bild: Markus Zahno (maz)
I rächt viune Wäuder fingt me e Ort, wo «Tanzplatz» oder «Tanzbode» heisst. «Vorder Tanzplatz» isch zum Byspiu im Topographische Atlas vor Schwyz usem 1871 ufgfüehrt. Dä Ort isch dr höchscht Punkt im Hohrütiwaud u zimli gnau uf dr March vo de Gmeine Frymettige u Niederhünige. Wos e «Vordere» git, fingt me o e «hingere Tanzplatz». Luschtigerwys isch dä grad ume ufere Gmeinsgränze nämlech dere vo Nieder- u Oberhünige. Mit 1088 Meter über Meer isch das fasch dr höchscht Punkt vom Toppwaud – es Högerli ganz ir Neechi isch no drei Meter höcher.
Wyter gits o no im Oberwaud z Dürrenroth e Tanzplatz.
Aber isch dert würklech tanzet worde? Ufem Parkett ir Wirtschaft im Dorf het me sicher gäbiger chönne schwofe.
Dass zmitts im Waud isch tanzet worde, isch müglech. D Obrigkeit het am Vouk i verschiedene Epoche ds Tanze verbote – de het sech d Jugend haut im Waud troffe, für chly z tanze. Vor auem d Chiuche isch gäge ds Tanze gsy. Me fingt scho i Sittemandat usem 14. Jahrhundert eso Regle. Sogar am Hochzyt hets gheisse: «nieman kein tantz, weder heimlich noch offentlich». Speter het me de a bestimmte Tage dörfe ds Tanzbei schwinge; öppe am Nöijahr, ar Fasnacht oder we Märit isch gsy. Nach dr Reformation sy die katholische Ständ wägem Tanze weniger sträng gsy aus die reformierte, wo doch süsch chly freigäbiger sy gsy. Wär bim Tanze isch verwütscht worde, het mit Buesse oder sogar Gfängnis müesse rächne. Trotz dr stränge Bestrafig het das Verbot aber nid so viu brunge. Das isch äue o da dranne gläge, dass die, wo hätte söue die Vorfäu mäude, säuber o gärn hei tanzet. Oder villecht het me enang o nid verpfiffe wüu die «höche Herre» mit de «höche Dame» ja o hei tanzet.
I einzelne Kantön, vor auem katholische, giut no hüt es Tanzverbot a bestimmte Tage.
Uf jedem Ort, wo Tanzplatz heisst, isch sicher nid tanzet worde. Es isch o vorcho, dass e äbene Platz imene süsch stotzige Gebiet eso isch benamset worde, wüu är chly usgseht wie neTanzflächi.
Mängisch isch offebar o um nes Böimli tanzet worde, wie dr Ytrag imene Urbar vo 1531 zeigt: «bim tantzboeumlj». Das Böimli isch amene Ort im Oberthau gstange.