Uf e 28. März 1827 het me im Schangnou wieder ds Veh zeut. Gägenüber am letschte Mau hets doch 31 Chüe meh gha, het dr Pfarrer Brugger i sire Chronik notiert. Me heig o zerscht Mau d Beijstöck zeut, es syge 48 gsy.
I sim Garte het dr Pfarrer wieder es paar nöii Böim gsetzt. Vo Lützuflüh heig är e St-Germain-Bire-Boum übercho, eis Zuckerbirli-Böimli u no ei Hirschbireboum. Bi de Öpfuböim het är e «Edelmalzach» notiert. Drzue het är es wytersch Aprikoseböimli a sire Ladewang pflanzt. Im Nachtrag schrybt dr Pfarrer aber, dass dä Hirschbireboum nid grate syg. Vo dene nöie Böim heigs ke Ertrag gä bis är im Jahr 1835 vo Schangnou furt syg – a dene het si Nachfouger drfür sicher Fröid gha.
Im Jahr 1828 isch es im Jäner so schön gsy, dass me dr ganz Monet nie heig Schee het gseh. Är syg im ganze Jänner im Garte gsy u heig chönne säie u wärche. D Bure heige aagfange d Ächer vorzbereite, dass me de zügig d Härdöpfu chönn ylege. Är schrybt no, dass die aute Lüt heige gseit, es syg vor zimli gnau hundert Jahr o ganz ähnlech Wätter gsy. Denn heig me scho im Mei chönne ärnte.
Das isch aber de nüt gsy, ab em Horner isch es cho schnejie. Dr Früehlig u o dr Summer syge nid bsungers schön gsy. Drfür hüüfig chaut, gruusig u nass.
Dr Schangnouer Pfarrer het i sire Chronik o ab u zue es Unglück müesse notiere: Aafangs Mei syg dr «Bochti-Bänz» bim Houze verunglückt. E Stapu Brönnhouz syg i ds Troole cho u heig dr Bänz erschlage.
Im Herbst het dr Pfarrer no es Zwöijährigs müesse beärdige, wo im Brunne ertrouche isch.
Wyter steit ir Chonik, dass es z Marbach denn zimli überschwemmt heig – drfür het me de aber d Strass uf Schangnou nöi gmacht u e Brügg übere Loui-Bach boue.
Im 1828 isch es 500 Jahr här gsy, sit dr Kanton Bärn d Reformation het ygfüehrt. Das isch o im Schangnou gfyret worde. Dr Brugger het zwar däicht, dass das nume Pfärrer intressieri u d Lüt nid. Aber am 31. Mei isch d Chiuche vo Schangnou vou gsy; 118 Persone syge cho. Är heig de dr Bricht vom Münschterpfarrer vorgläse, wo drinn isch beschribe worde, wie das denn vor 500 Jahr syg zur Reformation cho.
Weniger guet aachoo syg de dr Bschluss vor Regierig, dass dr «Kiltgang» ume verbote syg: Die tonnersch Schangnour Jünglinge heige nume afa lache!
Speter het sech dr Pfarrer no mit Schangnouer Töifer z tüe gha. Die Familie het z Wohle bi Bärn gwohnt. Dä Johann Gärber heig uf einisch ufghört siner Ching la z toufe. Si heige ihm de es zwöijährigs Buebli uf Schangnou gschickt, dass är das tüeg toufe. Är hets aber nid gmacht. «Der Kleine fürchtete sich und schrii gar sehr», het dr Pfarrer i dr Chronik gschribe.