E Spänd vo 400 Bärnchrone hets für ds Schueuhuus gä. / Bild: zvg
Ds Jahr 1827 het mit viu, viu Schnee aagfange. Niene heig me meh e Zuun gseh. Dr Summer syg aber glych guet gsy, es heig vo auem gää. Scho Aafang Ougschte syg d Gärtsche ryf gsy, was sehr früech syg. Är säuber heig im Pfarrhuusgarte 108 Mäss Frücht abgläse.
Im Früehlig syge Wahle gsy u dr Jakob Räber vom Waud isch Obmann worde. I däm Jahr, schrybt dr Pfarrer wyter, heig är im Pfarrgarte Buchsböimli aus Abgränzig la pflanze – das heig sech vor ihm kene trout im Schangnou.
Viu Zyt heig är mit em Bou vom nöie Spycher verplämperlet. Dr Oberamtmaa vo Langnou isch äxtra uf Schangnou cho, het aber gmeint, dr aut Spycher tüegs no. Me heig o ir Pfrundschüür dür nes Loch gseh, dass da no ei Ruum meh wär. Me het de dert es Töri gmacht, aber dä Ruum syg nid für viu gsy. Ömu heig är de die Herre chönne überzüge, dass e nöie Spycher nötig syg u het zäh Chrone überchoo. Das Rüümli ir Schüür heig me ume zuetaa. Öppis ufbewahre heig me nid chönne wägem Dampf vom Ofehuus – «jetzt aber sind die Mäuse so bös in diesem Gemach».
Im Juli 1827 isch es Gwitter vo Trueb här cho, het dr Truebschache verheert, mit Hagu u Räge. Bsungerbar dr Hämubach syg überschwemmt worde. Im ganze Amt Signou syg gsammelt worde. Im Schangnou sy 30 Helvetischi Franke zämecho.
Dr Pfarrer schrybt o vo dere Chindsmördere vo Signou, wo isch gköpft worde. Är heig aus Pfarrer bi dr «Uströschtig» müesse häufe. Die Mördere syg e eifäutigi, liechtsinnigi Frou gsy. Är heig am Tag vor Hyrichtig die Frou zäme mit angere Pfärrer müesse betröie. Si heige gäng z zwöit mitere müesse rede, aber das syg e Quau gsy, wüu die Frou chuum verstange heig, was vor sech göng. Är heig zum Glück nid uf e Platz müesse, wo dr Scharfrichter het gwartet. Är hoffi, «dass eine Zeit komme, da die Todesstraffe abgeschafft werde», schrybt dr Pfarrer drzue.
Im glyche Jahr isch dr Johann Siegenthaler, Grosshändler z Thun, gstorbe. Dä isch rych gsy u het im Auter a sini Heimatgmein däicht. Dr Pfarrer het ihm la säge, är söu doch gärn a d Schueu däiche. Schliesslich het dä Johann Siegenthaler 400 Bärnchrone i sim Teschtamänt für d Schueu vo Schangnou la gä. Am 10. Novemäber het de d Gmein bschlosse, es nöis Schueuhuus im Schangnou z boue.