Dr Pfarrer het e ganzi Zilete Böim la setze

Dr Pfarrer Brugger vo Schangnou schrybt am Schluss vom Bricht über ds Jahr 1825, dass är dr Garte im Pfarrhus heig umbout. Es heig afe viu Waseblätze gha, wüu siner Vorgänger sech nid heige für ds Gartne inträssiert. So heig är itze e änglische Landschaftsgarte la mache. Dr Priester vo Marbach heig ihm es ganzes Sortimänt vo Strücher glieferet, drunger o zwe Böim mit Damaszener Pflume, zwe Öpfu- (Raine d´été) u zwe Quitteböim. A dr Muur nah heig är de no Aprikoseböimli aapflanzet. Zwüsche dr Stäge heig är es Zwärgbireböimli gsetzt u mit Spalier heig är o aagfange. Vo Lützuflüeh syge no sächs Öpfuböimli gliferet worde. Zur Zier heig är de no hingerem Huus e Maronierboum (das isch e Ross-Chegele) u Akazie la setze. Das mit de Akazie syg aber nüt gsy; im Jahr druf heig är die dür Gürmsch ersetzt. 

Vom 1. Jäner  1826 aa sygs gruusig chaut worde. Fasch bis nach dr Oschtere heig är im Schueuhuus prediget – ir Chiuche sygs viu z chaut gsy. Im
ganze März heigs Bislufetet u die meischte Blüete a de Böim syge erfrore. Obscht heigs fasch kes gää. Drfür syg d Gärtsche u ds Gmües ordeli worde. Drzue heigs sehr viel Hungg gää. Mit sim Chnächt het är abgmacht, dass dä säuber chönn bure, är müess ihm aber gäng e Chue, es Schaf u nes Ross bereit ha. U ds Houz müess gspaute u gwedelet wärde. Drfür chönn dr Chnächt d Wohnig obe im Ofehuus inne ha. Wichtig isch es am Pfarrer gsy, dass är täglech zwü Määs Miuch z guet heig. So het är mit sim Chnächt, em Jakob Dolder, chönne gschäfte. Dr Dolder heig o es paar Obschtböim chönne ha u drzue het ihm no im Ofehuus es Plätzli für ne Sou ghört. 

Bsungerbar het mi no düecht, dass si dr Flachs, wo si hei aapflanzt, gäge Hagu heige versicheret! Är schrybt de no gäge ds Ändi vom Jahr, dass ne die grosse Bure heige kritisiert wäg däm Vertrag. Aber dr Pfarrer schrybt o, dass dr Jakob Dolder scho guet syg. Är zaagi zwar mängisch e chly, aber dr Dolder tüeg nach sine Aawysige bure! Wener e Schangnouer Buresuhn hätti gno, hät dä sowieso nume nach em aute Sinn u Geischt buret. Dr Pfarrer het Nöis usprobiert u Versüech mit Bschütti u Mischt gmacht. Är het Dinku, Gärschte, Rogge, Weize, Emmer, Flachs, Ärbs, Haber u Hanf aapflanzet. Är heig de o no 83 Schnägge Höi chönne ytue, wo dr Chüejer Jakob Bärtschi heig kouft.