Ds Günhorn isch itz nid grad unbedingt dää Gipfu hieumenang, wome sicher mau ueche muess. Es git übrigens o gar ke offizieue Wanderwäg dert ueche.
Für z Bärg ga isch das Horn auso nid so intressant, sprachlech aber scho. Ortsnäme mit «Gün» sy ir ganze Schwyz säute, ir Region vor Wuche-Zytig gits nume grad das Gebiet, wo chly nördlech vom Wachthubu ligt.
Das Wort stammt ursprünglech vom latinische «cuneus» ab. Drus isch de i dr romanische Sprach «kun» worde u da drus ds hütige «Gün». Abgseh vo es paar Ortsnäme isch das Wort bi üs usgstorbe; im Französische gits no es Wort, wo vo däm abstammt: «coin» – Egge, Keil.
Mit eme Egge het o d Bezeichnig Günhorn z tüe. Ds Gebiet Gün u Gündli het nämlech d Form vomene Keil, u dä isch ja eggig.
Offebar isch das Wort früecher o brucht worde, für Gebiet, wos e Hangrutsch het gä.
Zum Ortsname Gün passt d Bezeichnig Güntere. Eso heisst es Quartier am Rand vom Dorf Äschlismatt, grad vis-à-vis vor B.Braun-Fabrig. Die Sach schynt ufe erscht Blick klar z sy: «Güntere» chunnt vom Personename Günter. Das isch aber nid eso. Afe einisch isch Günter hieumenang nid grad e hüüfige Personename gsy, im Ungerschied zum grosse Kanton im Norde. Drzue chunnt, dass no hüt uf de Charte e zwöiti Bezeichnig z finge isch: «Güntenen». Dä Ortsname geit zrügg uf ds schwyzerdütsche «Gunte». Das Wort isch brucht worde für ne chlyne Teich oder e Vertöifig mit Wasser – ds hüt gebrüchleche «Glungge» isch mit däm verwandt.
Si Ursprung het das Wort im gallische «cumba», wo o für Mulde isch brucht worde. Da drus isch de ds authochdütsche «gumbito» entstange, wos sech nächär wyterentwicklet het zu «gunbet» u de zu «Güntene».
Inere Urkunde usem Jahr 1341 isch dä Ort z Äschlismatt aus «Güntinun» feschtghaute worde, im 16. Jahrhundert de aus «guntinen» u inere Schrift vo 1654 steit z ersch Mau «Güntenen».
Dass es im däm Gebiet vor Jahrhundert die einti oder angeri Glungge het gha, bewyse o d Ortsnäme näbedranne: D «Moosmatte» isch früecher äue o ender nass gsy u ir «Wanne» hets sicher o ab u zue Wasser gha.
Queue: «Ortsnamenbuch des Kantons Bern», «Orts- und Flurnamen des Amtes Entlebuch», idiotikon.ch u wyteri. Aafrage: 034 409 40 05 oder zuercher@wochen-zeitung.ch