Grad itze, woni im Schangnou dürelise, merken i, dass die Sach zwüsche Ämmitau u Äntlibuech grad e ganz e eigetümlechi Gschicht isch. Wo sech Bärn u Luzärn hei chönne einige, weli Gmein zu welem Kanton chöm, isch das no vor dr Reformation gsy. Marbach u Schangnou sy ir glyche Chirchgmein glandet, we o Schangnou definitiv zu Bärn u Marbach definitiv zu Luzärn sy cho. Vor Religion här het das ke Roue gspieut u o d Lüt het das nid gstört.
Nach der Reformation 1528 het das de gänderet. D Gränze isch fasch sichtbar worde. Schangnou het me aber mitenene Fuhrwärch nume über Marbach chönne erreiche. Dr Wäg ids
Eggiwiu het me nume z Fuess chönne, genau glych wie ids Oberland.
Es isch ja mehrmaus zwüsche de Eidgenosse zum Bürgerchrieg cho. Churz: d Verhäutnis zwüsche de Reformierte u de Katholische isch schlächt gsy. Jede het gmeint, die angere schaffe füre Tüfu u chöme i d Höu!
Es hei aber gäng no Bärner z Marbach gwohnt. Klar, für z hürate, toufe u beärdige het me uf Trueb oder ids Schangnou müesse. Die Bärner z Marchbach sy viu Pächter gsy; Luzärn het nid toleriert, dass die Land choufe.
Weni aber itze i dr Chronik vom Pfarramt Schangnou lise, faut mir uf, dass es doch Beziehige het gä. Scho um 1790 hets e Läsezirku im Oberämmitau gä. Dr Pfarrer vo Schangnou schrybt, dass si jedes Jahr heige müesse eis Buech choufe u das syg de im Wächsu vo eim Mitglied zum angere cho. Är heig vom Pfarrer vo Eggiwiu es Buech übercho zum Läse, wo är de am nächschte uf dr Lischte heig müesse bringe: Das isch dr Prieschter vo Marbach gsy! Dä hets de schyns am Wirt z Chröschebrunne
müesse bringe, wo e ganz bsungersch beläsene Maa syg gsy.
Dr Pfarrer Brugger schrybt
wyter, dass är im 1824, wo är si Steu im Schangnou heig aagfange, eigentlech erwartet heig, dass ne siner Kollege vo rundum chömi cho bsueche. Da syg de aber nüt gsy, weder dr Pfarrer vo Eggiwiu, Röthebach, Langnou oderTrueb u nid emau dr Häufer vom Truebschache heig öppis derglyche taa. Nume dr Felix Räber, Prieschter vo Marbach, sygne cho bsueche! Im 1826 het är im Chronikli ytreit, dass är mit em Kutschli uf Chröschebrunne syg gfahre, dert siner Pfarrer-Kollege vo Louperswiu, Trueb u Langnou u dr Häufer vo Trubschache heig ufglade u mit dene uf Aeschlismatt syg gfahre. Dert heige d Prieschter vo Äschlismatt, Marbach, Äntlibuech, Flüehli u Romoos uf se gwartet, zäme mit em Oberamtmaa Rüttimaa vo Schüpfe u no drei Dökter (Mediziner). Was besproche isch worde, steit nid, aber är schrybt «bei traulichen Gesprächen, Gläserklang u
Gesang» heige si e aagnähme Tag verbrunge. Me chönnt auso scho zäme uscho.