Chürzlech hani wieder e Vortrag gha zum Thema: Wie d Familienäme sy entstange. I bi aube froh, weme mir es paar Lüt
aagit, mit Name u Heimatort, wo a däm Aalass drby sy. Das sie bir Aamäudig hei müesse der Heimatort aagää, heig auso nüt mit dr Corona z tüe gha – aber mit mir.
So hani mi e chly chönne vorbereite. Die meischte sy zwar Ämmitauer oder Oberaargouer gsy u da hani d Näme ir Regu scho. Weni so e Vortrag ha, sy natürlech gäng öppe es paar frömdi Näme drby, öppe e Zürcher oder e Walliser. I de meischte Fäu hani de das Problem öppe schnäu glöst. Aber es git natürlech gäng o es paar Knacknüss. Schwierig wirds zum Byspiu, we Ätti oder Grossätti aus Asylant oder Wirtschaftsflüchtling i d Schwyz isch cho.
Eine vo dene Knacknüss isch denn grad dr Name Bichsu (Bichsel) gsy. Dä Name mit dere Schrybwys gits eigentlech nume im Ämmitau; hüt no aus Bürger vo Arni, Eggiwiu, Hasli, Heimiswiu, Lützuflüeh, Rüegsou u Sumiswaud. Früecher hets dä Name o no im Schwarzeburgerland gha, dert sy die aber «im Mannesstamme usgstorbe» wie mir im Fachchargo säge. Es git aber no ei Gmein im Oberaargou, wo Bichsu aus Bürger het, nämlech ds chyne Gmeindli Busswiu bi Melchnau. Die hei aber o e berühmte Bichsu, nämlech dr Schriftsteuer Peter Bichsel. Die vo Sumiswaud sy bekannt, d Familie Bichsu het d Haberflöckli i ds Ämmitau brunge, nid öppe d Familie Kentaur.
Vermuetlech isch dr Name us emene Ortsname entstange, es isch auso e Härkunftsbezeichnig. Bichsu gits im Eggiwiu aber o i de Gmeine Eriswiu u Wyssache. Wohär dr Name Bichsu aus Ortsname chunnt? Das Problem schiebeni elegant am Bruno Zürcher wyter. Dä weiss de das scho. I ha no gläse, dass das Wort öppis mit emene «Bächsel» z tüe heig. So het me früecher amene Bieli gseit, wo me brucht het für Dachchännle us Houz z houe. I luege das aus weniger wahrschynlech aa. De würdis dä Name meh gää u es isch ja so, dass jede Zimmermaa mit däm «Bächsel» het gwärchet.
Ender no wäri ds Wort «bochsel» müglech. Das Wort isch früecher für «lärme, chlopfe, donnere» brucht worde. De wär auso e Bichsu eine, wo lut redt oder e chly e Pouderi isch.