Error compiling Razor Template (contact the administrator for more details)

Hei d Wisler öppis miteme Wiseli z tüe?

Vor es paar Tag hani e Aafrag überchoo, wohär dr Familiename Wisler chömi u öb dä öppis miteme Wiseli z tüe heig. Wiselifäu sy extrem tüür u säute, bsungerbar ds wysse Winterfäu mitem schwarze Schwänzli. Vor Familieforschig här isch das mit de Wisler so e Sach. Hüt gits nume no z Sumiswaud Wisler oder Wissler, aber so um 1700 ume hets dä Name o no z Langnou gä, u dert sy das Töiferlüt gsy. Bekannt isch zum Byspiu, dass d Obrigkeit dr Hans u d Katharina Wisler vo Langnou 1703 hei verhaftet, wüu si Töifer sy gsy, u usem Land hei gheit. Dr Name het übrigens nüt mit de Wiseli z tüe. Dr Ursprung isch d Ahöchi Wisle ir Gmein Worb. Dä Ort isch scho sit 1389 bekannt. Vermuetlech chunnt dä Name vom Mittuhochdütsche Wort «Wihsel». Das isch e Boum, wo mir hüt «Weichsel» bezeichne oder Suurchirschi. Es isch auso nüt gsy mit em schöne Fääli vom Wiseli, es het auso öppis mit Chirschi, u de ersch no mit de suure, z tüe. Das es öppis mit däm Ort in Worb cha z tüe haa, cha me ersch no belege, wüu 1389 e Johans ab Wislen z Gysistei ire Urkunde erwähnt wird. Näbe Langnou chöme aber d Wisler scho rächt früeh z Sumiswaud vor. D Höf Horn u Dislishus im Hornbach hei dr Familie Wisler ghört, so lang es überhoupt Ungerlage git z Sumiswaud. Weni öppe Familienforschige mache, chumeni früecher oder speter gäng wieder i eine vo dene Stämm bi de Wisler. 1666 isch aber o e Wisler Lehrer gsy im Wase. Marx Weyssler het är gheisse. Marx het nüt mit Kommunischte z tüe, das isch dr bärndütsch Name für Markus. Der Lehrer isch büesst worde, wüu er im Wase hinger heig bhouptet, dass är dr Tüfu chönn banne. Der Pfarrer het ne de la «befrage» vorem Gricht. Weme em Gotthäuf si Biografie list, chunnt me o uf Wislers. D Brüeder Wisler hei im Goudbach e Tuechfabrig gha. Der eint, dr Chaschpu, isch drzue no Chronewirt gsy u e guete Jagdfründ vom Pfarrer Bitzius. Gouner aber gits öppe überau. O Wislers hei so öpper: Dr Jakob Wisler u si Frou Verena sy 1861 im Ramseregrabe z Langnou köpft worde, wüu si dr Schafbärgresli ermordet hei. Drfür isch der Notar Johann Friedrich Wisler dr Gründer vor Spar- u Leihkasse z Bärn (hüt Valiant Bank). Dr Otto Wisler isch aus Architekt vor Eidgenosseschaft beuftreit worde, d Schwyz a dr grosse Wäutus-steuig in Paris z verträte u der Stang z boue. Er het es schöns Huus im Schwyzerhüsli-Stil boue, wo dennzumale o ir Schwyz dr letscht Schrey isch gsy. Dr Profässer Clark Wissler vom Smithonian Institut het d Gschicht vo de Indianer a de grosse Seee z Nordamerika erforscht. Siner Vorfahre sy Täufer gsy, wo vo Langnou uf Amerika heige müesse flüchte.

10.06.2021 :: Hans Minder