Sigetustöckere isch eis vo mehrere Hüser vom «Sigo». / Bild: Bruno Zürcher (zue)
Churz «Sigetu» seit me am Ort, wo offizeu «Siegenthal» heisst. Es git dert, am nördöschtleche Rand vor Gmein Landiswiu, nid nume dr Wyler Sigetu, sondern o no es paar angeri Variante: «Sigetustöckere», «Hingersigetu» u när no «Sigetuhus» u «Sigetuhüsi». Dä Ortsname gits ir ganze Schwytz nume dert, isch auso e einzigartegi Sach – u interessant drzue. Immerhin isch us däm Ortsname es Familiegschlächt worde. So verwungerets nid, dass d Siegethaler Heimatort Bigle hei, wüu Landiswiu zur Chiuchgmein Bigle ghört u das scho sit Jahrhunderte. Es git aber o Siegenthaler mit Heimatort Schangnou, Eggiwiu, Langnou, Trueb, Truebschache, Signou u Louperswiu. D Ahne vo au dene Lüt dörfti aber im Sigetu gläbt ha. Dass es hüt so viu Lüt mit däm Name git, ligt entweder da dranne, dass die Siegethaler zimli viu Ching hei gha oder dass das e auti Sach isch. I historische Dokumänt fingt me ds Sigetu scho sehr früech: 1323 sy bereits zwo «scopose», auso Burehöf, «im Sigental» notiert worde. U dass die Lüt vo dert u Bigle hei z Chiuche müesse, bewyst dr Ytrag imene Urbar vo 1531: «Sigelenntal Jn der kilchoeri biglenn». Landiswiu het ersch sit 1954 e eigeti Chiuche. Dr Ursprung vom Ortsname Sigetu isch sicher no viu euter. Dä Ortsname geit uf d Churzform vomene Personename zrügg, wie zum Byspiu «Sigo» oder «Siggi». Dä wiederum treit ds authochdütsche Wort «sigu» i sich u das meint nüt angersch aus ds hüt gebrüchleche, hochdütsche «Sieg». Dä Maa isch auso zimli erfougrych gsy (oder d Eutere hei ghoffet, dass ihre Suhn das de wärdi). Es git no e Ort, wo ähnlech tönt u o e ähleche Ursprung het: dr «Siglisbach» oberhaub vo Rütene. Dä Bach macht d Gränze vo de Gmeine Oberhünige, Zäziwiu u Bowiu. Früecher hei o d Hüser, wo ir Neechi vom Bach lige, «Siglisbach» gheisse, was hüt offebar nümme eso isch. Im Signouer Urbar vo 1530 isch «Siglispach» bereits notiert worde. Ds Wort «Siglis» isch äbefaus d Churzform vomene Name. I Frag chunnt hie vor auem «Sigilo» oder «Sigili» – vor nes paar Jahrhundert sy haut angeri Näme ir Mode gsy aus hüt.