D Ämme het dere Landschaft dr Name gä. / Bild: Pedro Neuenschwander (pnz)
Ämmitau isch öppe dr bekanntischt Ortsname mit «Tau» – für Tourischte, Nostalgiker u Chäsliebhaber. Es isch aber nid so, dass das scho extrem lang eso isch. Die eutischte Dokumänt, wo «Emmental» drin vorchöme, sy im 14. Jahrhundert entstange. Guet, das isch itz nid grad nöi, aber es git mängs Heimet, wo scho früecher inere Urkunde isch notiert worde. Aber immerhin isch d Schribwys «Emmental» scho denn eso gsy, wie hüt.
Dass dr Begriff Ämmitau nid euter isch, ligt vor auem da dranne, dass das denn no kes Verwautigsgebiet isch gsy. Im Mittuauter hei d Zähringer, d Ky-
burger u d Habsburger gseit, wos düregeit. Für d Verwautig sy d Landvogteie wichtiger gsy; zum Byspiu Signou, Trachsuwaud, Brandis und Sumiswaud. D Landschaft Ämmitau het de «ersch» abem 16. Jahrhundert existiert – aus Nachfougeorganisation vo de Vogteie u vom Landgricht Raufli.
Was zum Ämmitau ghört u was nid, het geng ume chly gänderet. Afe einisch gits Verbänd – öppe für Musig, Singe, Schiesse oder Schwinge – wo sech uf d Region Ämmitau bezieh. Politisch gits sit es paar Jahr d Regionaukonferänz Ämmitau, wo 39 Gmeinde drzue ghöre. D Gmein Bowiu hät eigentlech o zu de Ämmitaler wöue, het aber müesse im Mittuland blybe. Dir gseht, es isch o hüt nid ganz klar, was zum
Ämmitau söu ghöre u was nid.
Grundsätzlech isch dr Fau ja klar: Ds Ämmitau isch ds Tau vor Ämme. Wo louft ds Wasser auso düre. Dr Fau Bowiu zeigt, das die Sach nid geng klar isch: Es het Bäch, wo ds Wasser speter id Chise, auso i Aara louft u settig, wo i d Ämme gö.
Dr Ämme säuber dörftis zimli glych sy, was zum Ämmitau ghört u was nid. Dr Name vom Fluss isch viu euter aus dä vom Tau. Flüss sy genereu früech
benamstet worde: Wasser isch wichtig gsy, Flüss het me o für ds Flösse brucht u när sy si o
taktisch wichtig gsy, öppe aus Schutz für ne Befestigung.
Was genau d Wurzle vom Wort «Emme» isch, sy sech d Sprachforscher o nid ganz einig. Es dörfti aber vom keltische Wort «ambis» abstamme, wo ganz eifach «Fluss» meint. Unklar isch, wenn dr «e» am Afang isch
ufcho. 1249 isch ömu scho
«Emmun» notiert worde.