Error compiling Razor Template (contact the administrator for more details)

We Briefe e Monet ungerwägs sy gsy

Z Signou isch d Fischer-Poscht scho ab 1788 gsy, ab 1790 hets o e regumässige Poschtkutschekurs gha vo Bärn uf Langnou u de wyter uf Luzärn. Ds erschte Poschtbüro isch im Thurm gsy. I dere Beiz het ja aube o ds Gricht taget. Am 5. Dezämber 1925 isch ufem Bahnhof e Zug entgleist u dr Poschtwage isch umkippet – zwee Pöschteler sy verletzt worde. 

Ufem Läber im Eggiwiu het im 1890gi einisch e Buur gmäudet, dass ihm eine e Brief heig gschickt, ohni Absänder. Drin gsy isch es Fränkli. Dr Absänder het gschribe, dass är das Fränkli einisch vorem Hus im Läber heig gfunge u gno, wüu är grüseli i Not syg gsy. Itze göngs ihm besser u drum tüeg är ihm das Fränkli wieder zrüggschicke! 

Im Ämmitau het me aber scho no öppe Poscht us auer Wäut übercho. Öppe mau het e usgwanderete Schangnouer hei gschribe, är heig itz z Ohio Land chönne choufe; oder e Trueber schrybt de Verwandte, dass är z Texas sövu Land heig, dass är dringend no zwee Brüetsche müess haa für z häufe. Einisch hani o e Brief gfunge, wo eine vo Argentinie gschribe het, dass är grüselig Päch heig gha dä Winter: Es syge ihm über 100 Chüe erfrore vo sine Tuusig. So um 1890 het das amene Ämmi-tauer Buur scho Ydruck gmacht. Me muess aber o gseh, dass die, wo ke Glück hei gha, nie e Brief hei gschribe. 

Vo de Chäshandusfirme gits rächt viu Briefe. Eine hani mau gfunge us St. Denis uf der Insle Réunion im Indische Ozean.
Dä isch am 19. Jänner 1869 ab-gschickt worde vomene Beckermeischter Vermeil. Per Schiff isch dä über d Seychelle uf Aden u vo dert uf Suez cho. När isch es mit Kameu dür d Wüschti
uf Alexandria gange (dr Suez-kanau isch denn no nid gsy). Vo Ägypte isch dä Brief wieder mitem Schiff uf Marseille cho u de mit dr Bahn über Gänf uf Langnou. Dert isch dr Brief am 17. Februar 1869 aacho. Är het bi Joosts e Chäs bsteut! 

Näb dr Gschäftsposcht sy o Zytige ufcho. Hie umenangere hets ds Ämmitauer Blatt gha vo Langnou u das isch ds Kampfblatt vo dr Radikale Partei gsy. Z Münsige sy d Ämmitauer Nachrichte druckt worde, d Lybzytig vo de Fromme. Ds Ämmi-tauer Blatt isch vo 1847 bis 1990 usecho, d Ämmitauer Nachrichte vo 1883 bis 1977. Dene beide Zytige muess me nid nachetruure, d Wuche-Zytig isch besser. 

04.03.2021 :: Hans Minder