D Statue vom Herr Romang,zvg. wo eigentlech e Wingeier isch gsy. / Bild: zvg
Schallenberger: Dä Familiename gits nume z Truebschache u z Signou. Um 1700 het dr Hof Steibach dr Familie Schallen-bärger ghört.
Schär: Schärs sy es auts Gschlächt vo Truebschache. 1780 isch dr Chrischtian Schär ufem Hofubärg by Zoubrügg eine vo de erschte Schnapsbrönner im Ämmitau gsy. Dr Johann Friedrich Schär, gebore 1846, isch zersch Seminarlehrer z Münchebuchsi gsy u speter Profässer für Handusrächt a dr Uni Züri. Är het i sine Wärch bsungerbar über ds Gnosseschaftsrächt gschribe.
Schenk: Schänk isch e wytverbreitete Name im Oberämmitau. Eso het me amene Wirt gseit.
Schwarz: D Familie Schwarz, wo ihre Name äue dunkle Haar z verdanke het, toucht z Truebschache ersch spät uf. Die meischte Schwarz, woni bis itze ha funge, sy ursprünglech Langnouer gsy.
Siegenthaler: D Sigitauer vo Truebschache sy ursprünglech fasch aues Senne gsy.
Widmer, Wiedmer, Wittwer: Wiedmer u Wittwer gits rächt viu u hüfig, aber es git hüt drei verschiedeni Schrybwyse, wo schlussändlich die glychi Familie isch. Die hei ihre Name, wüu si ursprünglech uf Land hei buret, wo dr Chiuche oder amene Chloster het ghört u ihne isch «gwidmet» worde.
Wingeier: Dr Hof Wingei isch hüt no ir Gmein Truebschache, die Familie chunnt vo dert. Zu däm Gschlächt hani grad zwo intressanti Episode gfunge: 1679 isch e Wingeier uf Louperswiu, wüu si Tochter e Chammermaa het wöue hürate. Dr Brutvater syg ordeli früech uf Louperswiu, wo de am Abe das Hochzyt isch gsy. Vom Wywarm syg är scho zimli voue gsy. Ir Chiuche sygs ihm zimli schlächt gange u schlussändlech heig är de «die Gottes Gaben wieder von sich geschüttet». Dä Uftritt het es Nachspiu gha. Är het ei Tag i Turm z Trachsuwaud müesse.
Berüehmt isch o dr Peter Wingeier worde: Dä het e Betrug gmacht u isch de uf Argentinie gflüchtet. Dert het är sich un-gerem Name «Romang» aus Dokter usgää u es Dorf gründet, wo hüt no Romang heisst.
Zürcher: Dr Peter Zürcher vo Truebschache het d Müli im Schangnou gha u het de die sim Suhn abträte. Är isch de uf -Truebschache zrügg u het dert mit Garn afa handle. Är isch e sehr beläsene Maa gsy u het sogar ir Bibliothek vor Hochschueu Bärn aube Büecher usglehnt!