Es geit no chly wyter mit de Familie us Truebschache:
Fuhrer: Das isch eine vo de eutischte u hüfigschte Näme vo Truebschache u stammt eigentlech vo dr Ortsbezeichnig Fuhre ab. Viu Fuhrer sy Senne u Chüejer gsy. Vieh z züchte isch nid ganz ungfährlech: 1792 het e Muni mit sine Hörner dr Hans Fuhrer tödlech verletzt.
Gerber: D Familie Gärber vo Truebschache chunnt vom Hof «Egg». Genau hani no nid usefunge, wo das isch, aber i vermuete dr Hof «Hauenenegg» oder uf dr «Näbenegg».
Grimm: Dr Familiename Grimm isch z Truebschache u Louperschwiu aut beleit. Dr Stammhof vo de Grimm isch d Schwand. Wo dr Lienhard Grimm Chorrichter isch gsy, isch dr Louperschwiuviertu vo Louperschwiu abtrennt worde. Är het de statt uf Louperschwiu uf Trueb a ds Chorgricht chönne.
Krähenbühl: Vo Chräiebüeus hani nid viu gfunge. I bi o hie nid sicher, ob der Familiename mitem Heimatort Truebschache überhoupt no existiert.
Maring: Das isch e Name, wo 1861 z Truebschache isch ybürgeret worde. Das heisst, si sy Landsasse vom Kanton Bärn gsy. Das sy Familie gsy, wo bis denn no ke Bürgerort hei gha. Konkret hei si nie ds Gäud gha, fürnes Bürgerrächt z Choufe. 1861 si de aui Landsasse andere Gmeinde zueteut worde. Dä Name chunnt süsch nume grad no z Eggiwiu vor. D Eggiwiuer u Truebschacher Maring chömme ursprünglich us em Dütsche, us Münster im Westfählische. Si syge Gloubensflüchtlinge gsy. Ir Zyt vor Gägereformation hei sy nid wieder katholisch wöue wärde u sy drum ids sicher reformierte Bärnbiet gflüchtet.
Pfister: Viu Lüt wüsse äue gar nümme, was Pfister bedütet. Das chunnt vom latinische «pistor», auso Beck! Brot hets im Mittuauter nume säute gää, die meischte Lüt hei ds Getreide klopfet u de Brei kochet, öppe so, wie me das nüt no ds Ängland zum Zmorge macht. Brot hei nume dr Adu u die Geistleche gässe. Dr Familiename Pfister isch im Truebschache scho autbeleit. E Chasper Pfister isch scho um 1620 erwähnt. 1670 het e Hans Pfischter z Trueb e Toufschyn abgää. Är het nämlech sis eutischte Meitli im Eusass la toufe. Ir Familie Pfister gits o rächt viu Nöitöifer.
Rothenbühler: Dr Hof Rothebüeu isch hüt ir Gmein Trachsuwaud. Scho 1650 fingt me die erschte Yträg z Trueb über ne
Familie Rothebüeler, wo im Louperswiuviertu isch gwohnt. E intressante Bruef het dr Jakob Rothenbüeler ufem Lüfteli gha: Är het um ds Jahr 1770 aagfange Chiucheorgele z boue.
Röthlisberger: O dr Hof Röth- lisbärg isch im Heimisbach. Die meischte Röthlisbärger sy Langnouer Bürger. Es git aber o die vo Truebschache. Die erschte sy um ds Jahr 1700 Müller gsy i dr Ämmematt-Ried-Mühli.