I letschter Zyt hani grad es paar Aafrage vo Bürger vo Truebschache gha, ob i öppis chönnt usefinge über ihrer Familienäme.
D Familieforschig i dere Gmein isch rächt ufwändig, wüu me ja gäng muess unger Trueb u Langnou sueche, wüus z Truebschache ersch sit 1840 e eigeti Chiuche u drmit o eigeti
Chiuchebüecher het gä. E Bitz vo Truebschache het bis 1666 sogar zur Gmein Louperschwiu ghört – ds sogenannte Louperschwiuviertu. Das hani aber scho einisch imene «Vo früecher» verzeut. Itz wott nech aber no chly öppis über verschiedeni Näme vo Truebschache verzeue:
Baumgartner: D Boumgartner vo Truebschache chöme vom Hof Oberbärge, sy aber de um 1680 zu de Töifer gange u speter i Jura usgwanderet. Fasch aui Boumgarnter vo Truebschache hei drum hüt Töiferwurzle.
E Maria Magdalena Boumgartner isch 1779 äxtra vo St. Imier uf Truebschache cho u het sech ir Chiuche z Trueb la toufe, wüu si nümme het wöue e Töifere sy. Dr Landvogt säuber, dr Gmeins-
presidänt vo Trueb u d Maria Flückiger, d Ehefrou vom
Michael Schüpbach (Schärer Micheli) sy ihre Gotte u Götti gsy.
Beutler: Bütler isch es Handwärker-Gschlächt gsy. Dä, woni z Truebschache ha gfunge, isch aber dr Chrämer gsy, wo ds
Himuhus heig la boue.
Blaser: Dr Familie Blaser het bis 1759 ds vordere Wingei-Guet ghört. Dr Peter Blaser het föif Töchtere gha u dr Hof am einte Schwiegersuhn, am Ueli Grimm, übergää. Dr Adouf Blaser, wo 1908 isch gebore, isch Lehrer z Urtene gsy u het für d SP politisiert. Är isch sit 1950 im Grosse Rat gsy u 1964 Regierigsrat worde. Är isch verantwortlech gsy für ds Spitaugsetz vo 1973.
Brechbühl: Dr Christian Brächbüeu uf dr Schwand isch 1653 im Burechrieg ganz vore gstange. Är het ds Guet uf dr Schwand u d Mühli im Truebschache gha. Wäge sine viune Schulde het me ne chuum chönne büesse. Brächbüeus sy meischtens Bure gsy, ersch speter sy o Handwärker vorcho.
Engimann: E Jakob Ängimaa isch 1665 z Langnou mit ere bsungere Bewilligung vo Louperschwiu mitere Bäbi Blap-pacher verhüratet worde. Sithär gits dä Name ir Gmein Truebschache aus Bürgerfamilie.
Zimli schnäu isch die Familie aus Handwärker im ganze Kanton verströit gsy, nume z Truebschache het kene me gwohnt.